Tags-Badan

aaj is tarah milā tū ki lahū jaag uThā
yuuñ to aatī rahī ḳhushbu-e-badan pahle bhī

vo ek raat kī gardish meñ itnā haar gayā
libās pahne rahā aur badan utaar gayā

be-hijāb-e-nafs thā vo yā koī ġhāfil badan
pairahan jo bhī diyā hai taar taar us ne kiyā

ai 'valī' gul-badan kuuñ baaġh meñ dekh
dil-e-sad-chāk bāġh-bāġh huā

milā kisī se na achchhā lagā suḳhan is baar
banā hai lāshoñ ke a.azā se ye badan is baar

kuchh ajab sā huuñ sitamgar maiñ bhī
us pe khultā huuñ badan bhar maiñ bhī

badan phir se ugā legī ye miTTī
ki maiñ ne jaañ abhī haarī nahīñ hai

ham bhī jab tak jiye sarsabz hī sarsabz rahe
vaqt ne zahr utārā thā badan meñ aisā

badan se lipTī rahī taar taar ho kar bhī
hameñ aziiz bhalā kyuuñ na ho qabā-e-suḳhan

ajnabī hai tire ḳhush-rañg badan kī ḳhushbū
ik zarā lams-e-vafā tujh meñ samoyā jaa.e

lahreñ uTh uTh ke magar us kā badan chūmtī thiiñ
vo jo paanī meñ gayā ḳhuub hī dariyā chamkā

tumhāre chhūne se kuchh raushnī badan ko milī
vagarna us ko faqat rākh-dān honā thā

yak-qalam ai gul-badan rashk-e-gul-e-qālīñ hai dekh
farsh-e-ḳhākistar hai terā ye nihāl-e-naqsh-e-pā

tilism-e-ḳhvāb se merā badan patthar nahīñ hotā
mirī jab aañkh khultī hai maiñ bistar par nahīñ hotā

dhuup se kyā shikāyateñ ki badan
chāñdnī-rāt meñ bhī jaltā hai

maiñ badan ko dard ke malbūs pahnātā rahā
ruuh tak phailī huī miltī hai uryānī mujhe

ḳhushbu-e-badan aa.ī hai phir mauj-e-sabā se
phir kis ko pukārā hai tire shahr tarab ne

kaasa gadāgarī kā hai nāf-piyāla yaar kā
bhuuk hai vo badan tamām vasl tamām rañj hai

jadīd duniyā meñ aane vāloñ kī pahlī muDbheḌ ham se hotī
hamāre unit kā kaam un ke badan se mohreñ utārnā thā

ḳhirāj māñgtā hai mujh se ye badan merā
ki lauh-e-dil pe tirā naam bhī likhā huā hai