Tags-Badan

mausam kā taqāza hai ki lazzat kā badan chuum
ḳhvāhish ke daraḳhtoñ meñ havā tez bahut hai

ḳhaak ke putloñ meñ patthar ke badan ko vāstā
is sanam-ḳhāne meñ saarī umr mujh se hī paḌā

gher letī hai koī zulf, koī bū-e-badan
jaan kar koī giraftār nahīñ hotā yaar

ruuh suntī hai mohabbat meñ badan bolte haiñ
lafz pairāya-e-iz.hār nahīñ hotā yaar

mujhe to yuuñ lagā tarshā huā thā sho.ala koī
badan hī aisā thā kuchh pairahan hī aisā thā

haiñ lāpata zamāne se saare ke saare ḳhvāb
kis ke badan se lipTe hue haiñ hamāre ḳhvāb

shabāb hai mire saaqī kā āftāb kī lau
badan hai saaz meñ dīpak kī ik numū yārāñ

shahnāz-e-gul batā de zarā ahl-e-shauq ko
ḳhushbū ye kis badan kī tire pairahan meñ hai

yā badan kī qaid se āzād kar
yā kisī ġham se mujhe zanjīr kar

āñkhoñ se uñgliyoñ se laboñ se ḳhayāl se
jis jis badan meñ jo hai samāñ dekhte chaleñ

muhīb rātoñ meñ Dagmagāte dukhī badan ke musāfiroñ ko
akele-pan meñ Darā rahī hai samay ke jañgal kī saa.eñ saa.eñ

havā kī talvār chal rahī ho to shāḳh-e-ummīd kyā sambhāleñ
badan kī dīvār gir rahī ho to dil kī dīvār kyā bachā.eñ

diloñ ke beach badan kī fasīl uThā dī jaa.e
simaT rahī hai masāfat zarā baḌhā dī jaa.e

chhūne ko baḌh jaatī hai vo mom badan
aag kahāñ poroñ meñ rakkhī jaatī hai

qatre mile jo tere pasīne ke gul-badan
ḳhvāhāñ rahe na log gulāb-e-chakīda ke

merā badan hai kitnī rūhoñ kā maskan
merī jabīñ par kitne katbe likkhe haiñ

reza reza huā qasr-e-pindār
be-tarah zor-e-badan TuuTā thā

jab chamaktā thā badan kā sūraj
dhuup ban kar maiñ bikhar jaatā thā

phir tire ishq meñ ḳhushbū kā badan pahne hue
tirī chaukhaT pe agar ban ke jalī jā.ūñ piyā

manzar ko dekh dekh ke āñkheñ chalī ga.iiñ
hāthoñ se aaj apnā badan DhūñDhtā huuñ maiñ