Tags-Badan

be-adab nañgī nigāhoñ se bachāne ke liye
ham ne ma.anī ko badan alfāz ko paikar diye

ġhazab kī us barf-basta ThanDī havā meñ sailāb chāñdnī kā
badan to hai munjamid ragoñ meñ lahū magar tamtamā rahā hai

is aarzū meñ badan ho gayā hai zaḳhm-ālūd
ki ek raat gulāboñ pe so ke dekhte haiñ

kabhī to sard lagā dopahar kā sūraj bhī
kabhī badan ke liye ik karan ziyāda huī

safar kā marhala-e-saḳht hī ġhanīmat thā
Thahar ga.e to badan kī thakan ziyāda huī

nuzūl-e-mausam-e-tahqīr-e-jāñ se bachne kī
gulāb aise badan ne duā nahīñ māñgī

jild-e-badan hai taḳhta-e-mashq-e-sipāh-e-ġham
rahtī hai ye kitāb risāloñ ke sāmne

badan meñ jaise lahū tāziyāna ho gayā hai
use gale se lagā.e zamāna ho gayā hai

laraz ke TuuT hī jaa.e na aaj barg-e-badan
lahū meñ qurb kī garmī ragoñ meñ lū hai bahut

do jism kabhī ek badan ho nahīñ sakte
miltī jo koī ruuh to yak jaan banāte

kyā sabab tere badan ke garm hone kā sajan
āshiqoñ meñ kaun jaltā thā gale kis ke lagā

kahāñ Duube kidhar ubhre badan kī naav dekheñ
ki itnī duur tak dariyā-e-jāñ phailā huā hai

us ko ye zid hai ki rah jaa.e badan sar na rahe
ghūmtī jaa.e zamīñ aur koī mehvar na rahe

vo degā ruuh ko nām-o-nasab kī mahrūmī
badan kī Dor se rishte bahut piro.egā

rashk aadā ne kiye raushan badan meñ ustuḳhvāñ
sham-e-mahfil ho ke uTThe aap kī mahfil se ham

ubhartī Dūbtī guzre hue visāl kī naav
badan ke bahr meñ paḌtā huā bhañvar koī

tishna-e-zaḳhm na rahne de badan ko 'ahmad'
aisī talvār sar-e-shahr uchhālī jaa.e

ḳhayāl kab se chhupā ke ye man meñ rakkhā hai
mirā qarār tumhāre badan meñ rakkhā hai

zaḳhm itne haiñ badan par ki kahīñ dard nahīñ
ham bhī pathrāv meñ patthar ke hue jaate haiñ

kisī ke shoḳh badan kī zarūratoñ kī tarah
tamām raat sulagtī rahī hai tanhā.ī