Tags-Badan

agar vo gul-badan dariyā nahāne be-hijāb aave
ta.ajjub nahiñ ki sab paanī satī bū-e-gulāb aave

tanhā.iyoñ kī barf thī bistar pe jā-ba-jā
sho.aloñ kā raqs raat badan par na ho sakā

naḳhl-e-jāñ pe jo barastā terā bādal 'mariyam'
kuchh to kam badan kī ye tishna-dahānī hotī

jhūmte jaam sā chhalaktā badan
ek jām-e-sharāb dekhā hai

badan se lipTe rahe be-zamīniyoñ ke azaab
talāsh-e-rizq kī ḳhātir jidhar jidhar bhī ga.e

guzar chuke haiñ badan se aage najāt kā ḳhvāb ham hue haiñ
muhīt sāñsoñ ke paar jā kar bahut hī nāyāb ham hue haiñ

rañg kī aañch meñ jaltā huā ḳhushbū kā badan
aañkh us phuul kī tasvīr meñ kyā kyā dekhe

tum apnī kaj-kulāhī haar baiThīñ
badan ko be-libāda kar liyā kyā

jo yaksar jaan hai us ke badan se
kaho kuchh istifāda kar liyā kyā

ye be-kanār badan kaun paar kar paayā
bahe chale ga.e sab log is ravānī meñ

har bun-e-mū se chhalakne lagī yādoñ kī sharāb
aur gulnār huā terā badan āḳhir-e-shab

baḌhtī jaatī hai ḳhayāloñ kī thakan āḳhir-e-shab
TūTne lagte haiñ yādoñ ke badan āḳhir-e-shab

vo chiiz kyā hai ki jis kī talāsh meñ 'at.har'
udheḌ udheḌ ke apnā badan dhunoñ ḳhud ko

darpesh junūñ kā marhala aur
faaqa hai badan to pyaas āñkheñ

badan sun ho gayā hai baiThe baiThe
mire qad se bhī chhoTā ye makāñ hai

tū mere gaañv ke hisse kī chhāñv bhī le jā
magar badan pe kabhī dhuup tāntā hai to aa

is liye bhī ye badan khīñchnā paḌtā hai mujhe
jitne sikke the mire paas zamānī nikle

ragoñ meñ aaj bhī raushan haiñ surḳh-o-zard charāġh
ajiib shai the vo ishrat badan nashīle se

paḌā hai kab se siyah-posh merā dasht-e-badan
charāġh is meñ jalā de kisī bhī hiile se

jab aadmī ke peT meñ aatī haiñ roTiyāñ
phūlī nahīñ badan meñ samātī haiñ roTiyāñ