Tags-Badan

qīmat-e-jāñ kī tavaqqo kaf-e-qātil se kahāñ
ḳhūñ-bahā ye hai ki ḳhanjar kā badan dukhtā hai

ab tire lams ko yaad karne kā ik silsila aur dīvāna-pan rah gayā
tū kahīñ kho gayā aur pahlū meñ terī shabāhat liye ik badan rah gayā

nazar nazar kī yaqīñ-pasandī pe ḳhush thī lekin
badan badan kī gumāñ-risānī se Dar rahā thā

shab-e-hijr meñ gul-badan ke 'sirāj'
nazar meñ mirī sham.a jiyūñ ḳhaar hai

har ek shāḳh pe vīrāniyāñ musallat haiñ
badan-daraḳht bhī goyā hai āshiyān-e-shab

na thī zamīn meñ vus.at mirī nazar jaisī
badan thakā bhī nahīñ aur safar tamām huā

mire badan meñ khule jañgaloñ kī miTTī hai
mujhe sambhāl ke rakhnā bikhar na jā.ūñ meñ

kāġhazoñ se maiñ tirā uryāñ badan dhakne lagā
jo bachā rakkhī thī ab tak vo matā-e-fan ga.ī

mire badan kī ziyā baḌh ga.ī thī sūraj se
lahū meñ raat milānī paḌī hai āḳhir-kār

parde meñ is badan ke chhupeñ raaz kis tarah
ḳhushbū na hogī phuul kī ġhammāz kis tarah

lāzim kahāñ ki saarā jahāñ ḳhush-libās ho
mailā badan pahan ke na itnā udaas ho

bāhar damaktī barf meñ andar mahaktī raat meñ
us ke badan kā phuul hai jaise havā ke haat meñ

guzar rahā huuñ maiñ saudā-garoñ kī bastī se
badan pe dekhiye kab tak libās rahtā hai

badan ke saa.e ko dil ke qarīb dekhtā huuñ
ye aaj kis se bichhaḌne kā hai malāl mujhe

phir usī gul-badan kī yaad aa.ī
phir mahak sī hai daaġh meñ dil ke

lahū merī nasoñ meñ bhī kabhī kā jam chukā thā
badan par barf ko oḌhe nadī bhī so rahī thī

mire badan meñ lahū kā kaTāv aisā thā
ki merā har-bun-e-mū ek ghaav aisā thā

maiñ jis jagah huuñ vahāñ būd-o-bāsh kis kī hai
mire badan ke kafan meñ ye laash kis kī hai

vo saaya jo bujhā to kyā badan bhī saath bujh gayā
nazar ko tīrgī kā ab malāl kyuuñ nahīñ rahā

ehsās bikhrā bikhrā sā haarā huā badan
chaḌhtī harārtoñ kā nasha kaun le gayā