Tags-Badan

shab bhar badan manāte rahe jashn-e-māhtāb
aa.ī sahar to jaise andheroñ se bhar ga.e

tere badan kī lau meñ karishma numū kā thā
ġhunche jo terī sej pe jaage sañvar ga.e

tirī chaal se hashr bapā jo kiyā tire ḳhauf se haal mirī ye huā
huī jaatī thī ruuh badan meñ fanā mujhe āmad-e-roz-e-jazā kī qasam

maiñ ghar se duur utāq-e-badan meñ rahtā huuñ
savād-e-hijr ke bāb-e-kuhan meñ rahtā huuñ

tujhe paane kī uljhan meñ kuchh aise din bhī guzre haiñ
badan shabnam se jaltā thā qazā bistar pe rakkhī thī

chhilte the badan jin ke havāoñ se vahī gul
bulbul ke haiñ sab qatl pe ḳhāmosh ai jaanā

tere badan ke taab se hai darmiyāñ umas
lekin tujhe judā karūñ aisī umas nahīñ

'zulfī' dukhoñ kī dhuup meñ jalte hue badan
bādal guzar gayā hai ka.ī baar dekh kar

havā kā taḳht bichhātā huuñ raqs kartā huuñ
badan charāġh banātā huuñ raqs kartā huuñ

hai har barahnagī kā labāda par-e-badan
is ḳhāk-dāñ kā husn zamān-o-makāñ se hai

ḳhud agar naam luuñ terā to laraztā hai badan
ġhair gar baat kare choT sivā lagtī hai

badan kā pairahan chhoTā mujhe paḌne lagā itnā
maiñ khul kar saañs lene ko bhī uryānī meñ huuñ yaaro

kaun hai tujh sā jo bāñTe mirī din bhar kī thakan
muzmahil raat hai bistar kā badan dukhtā hai

paikar-e-nīm-shikasta huuñ karo tesha-zanī
bārish-e-gul se ye patthar kā badan dukhtā hai

dard maujoñ kī rifāqat kā baḌā hai shāyad
qurb-e-sāhil se shanāvar kā badan dukhtā hai

chaa.e meñ us ke pistāñ the
merā badan paanī meñ thā

ḳhūñ-girafta ho to ḳhanjar kā badan dukhtā hai
panja-e-ḳhair meñ hī shar kā badan dukhtā hai

qīmat-e-jāñ kī tavaqqo kaf-e-qātil se kahāñ
ḳhūñ-bahā ye hai ki ḳhanjar kā badan dukhtā hai

boTī boTī jaltī thī
us kā badan añgārā thā

zaḳhm-ḳhurda dar o dīvār kī hālat hai ajab
sirf aahaT se mire ghar kā badan dukhtā hai