Tags-Badan

saḳht ḳhajlat hogī dekh ai shauq-e-uryānī mujhe
aaj agar ik taar bhī baaqī badan par rah gayā

sadiyoñ se be-libās darīda-badan udaas
tasvīr-e-kā.enāt meñ be-rañg-o-nūr huuñ

us ne ġhurbat ke badan pe
basantī cholā piilī pagḌī

balā kī dhuup thī maiñ jal rahā thā
badan us kā thā aur saaya mirā thā

ruuh kī chīḳheñ badan meñ bahr-e-tasdīq-e-hayāt
aur tausīq-e-navā-e-dil tirī yādoñ kī guuñj

ḳhvāhishoñ kī aañch meñ tapte badan kī lazzateñ haiñ
aur vahshī raat hai gumrāhiyāñ sar par uThā.e

gir rahe haiñ badan pe shāḳh se phuul
chhū rahī hai sabā lab-o-ruḳhsār

merā saarā badan raakh ho bhī chukā maiñ ne dil ko bachāyā hai tere liye
TuuTe phūTe se dīvār-o-dar haiñ sabhī phir bhī ghar ko sajāyā hai tere liye

nisbat phir us se kyā mah-e-dāġhī ko dījiye
saare badan meñ jis ke na ho ek til kahīñ

lahroñ meñ badan uchhālte haiñ
aao ki falak meñ Dūbte haiñ

bahte hue do badan samundar
hoñToñ ke kināre aa lage haiñ

TūTte badan meñ dil ajiib shai hai
retīlī zamīñ meñ phuul khil rahā hai

badan ko chaaT liyā hai siyāh kaa.ī ne
abhī to kitne samundar haiñ paar karne ko

guzar rahe haiñ ba-ujlat bahār ke ayyām
paḌā hai raḳht-e-badan taar taar karne ko

pākīza ehsās ke hāthoñ pyaas kī kaisī maut huī
ḳhushk laboñ par zabāñ phertā Dole badan hathiyārā sā

sunñe ko husn-e-yār kī ḳhūbī ba-rañg-e-gul
a.azā mire badan ke sabhī gosh ho ga.e

shab ko kisī ke ḳhvāb meñ aayā na ho kahīñ
dukhte haiñ aaj us but-e-nāzuk-badan ke paañv

daaġh chhalle kā sarāpe meñ kudūrat-zā huā
gul-ruḳhoñ naḳhl-e-badan meñ gul hai gul meñ ḳhaak hai

mire jugnū
ruko apne badan se merī ḳhushbū jhaaḌ Daalo

shanāḳht kar na sakā ā.ina-nazar bhī use
har ek shāḳh-e-badan laḳht laḳht aisī thī