Tags-Badan

maiñ gard-posh ho ke banā shāḳh-e-za.afarāñ
lipTā huā hai mere badan se yahāñ basant

ai raat mujhe maañ kī tarah god meñ le le
din bhar kī mashaqqat se badan TuuT rahā hai

aah ko bād-e-sabā dard ko ḳhushbū likhnā
hai bajā zaḳhm-e-badan ko gul-e-ḳhud-rū likhnā

ye rañg rañg ke paikar ye tez mausīqī
har ik badan pe ka.ī zaḳhm haiñ thirakte hue

le ke bārūd kā badan yaaro
aag lene nikal paḌe haiñ log

maiñ us ke badan kī muqaddas kitāb
nihāyat aqīdat se paḌhtā rahā

sūraj sī us kī tab.a hai sho.ala sā us kā rañg
chhū jaa.e us badan ko to paanī ubal paḌe

koī baaġh sā sajā huā mire sāmne
ki badan hai koī khilā huā mire sāmne

jo shah milī to dil mirā bebāk ho gayā
nairañgī-e-badan meñ bahut der tak rahā

kisī bhī lamhe nikal jā.ūñgā havā kī tarah
mirā badan hai hisār-e-habāb kī sūrat

ise bhī saañs lene de ki har-dam
badan bāhar nikalnā chāhtā hai

lahū tezāb karnā chāhtā hai
badan ik aag dariyā chāhtā hai

is kā titlī sā badan duur se dekhā jaa.e
vo kisī haath meñ aate hue mar saktā hai

maut kyā aa.ī tap-e-furqat se sehat ho ga.ī
dam nikalne se badan ThanDā huā ranjūr kā

purānī hai numū-āsār hai phir bhī ye miTTī
badan se aur abhī kuchh istifāda chāhte haiñ

badan ke baaġh meñ sab raunaqeñ haiñ dil ke qarīb
isī navāh meñ bād-e-sabā ziyāda hai

badan kī raushnī meñ jo na dekhā jā sakā ham se
usī shīshe ke paikar meñ dhaḌaktā thā vo patthar bhī

tez be-tartīb dhaḌkan aur nafs phūlā huā
zard chehra aur pasīne se badan bhīgā huā

vo jo dard thā tire ishq kā vahī harf harf-e-suḳhan meñ hai
vahī qatra qatra lahū banā vahī reza reza badan meñ hai

ho gul bulbul tabhī bulbul pe bulbul phuul kar gul ho
tire gar gul-badan bar meñ qabā-e-chashm-e-bulbul ho