Tags-Badan

itnā lahū lahū to nahīñ thā badan mirā
haañ zaḳhm ik harā thā mujhe itnā yaad hai

badan ke paar utarte hī khul ga.iiñ āñkheñ
surāġh tere sarāpā se tuur kā niklā

badan meñ sarsarātī hai ḳhamoshī
ragoñ meñ vahshateñ sī nāchtī haiñ

ai javānāñ nau-bahārāñ meñ qadah-noshī karo
gul-badan saaqī setī har shab ham-āġhoshī karo

maiñ dasht huuñ ye muġhālta hai na shā.irāna mubālaġha hai
mire badan par kahīñ qadam rakh ke dekh naqsh-e-qadam banegā

ye dekhte hī hujūm biphrā bhaḌak uThe yuuñ ġhazab
ki shole ke jaise nañge badan pe jābir ke tāziyāne

gul o bulbul kā gulshan meñ ḳhalal hove to barjā hai
chaman meñ jab chale vo gul-badan āhista-āhista

'muntahī' zor-e-badan quvvat-e-dil chālākī
ek aane se za.īfī ke gayā kyā kyā kuchh

badan churāte hue ruuh meñ samāyā kar
maiñ apnī dhuup meñ soyā huā huuñ saayā kar

badan Dhāñpe hue phirtā huuñ yaanī
havas ke naam par dhāgā nahīñ hai

badan ke loch tak āzād hai vo
use tahzīb ne bāñdhā nahīñ hai

paañv thak jaa.eñ badan kāñpe yā dil ghabrā.e
jalte sahrā se hameñ roz guzarnā hogā

badan-e-yār ko bas chhū ke na itrā.e havā
itr kī ban ke lipaT mujh se lipaT jaa.e havā

badan-e-yār kī bū-bās uḌā laa.e havā
jaan aa.e jo vahāñ ho ke yahāñ aa.e havā

badan kī aag ko kahte haiñ log jhūTī aag
magar us aag ne dil ko mire gudāz kiyā

maiñ zahr piitā rahā zindagī ke hāthoñ se
ye aur baat hai merā badan harā na huā

be-nām se kuchh dard yahāñ Thahre hue haiñ
hai ek sarā.e kī tarah apnā badan bhī

raat ke kaale badan pe sitāre Tāñkne kī mashq
apnī ruuh par paivand lagāne jaisī mushkil nahīñ hotī

mire badan kī ragoñ meñ sharāb kī sūrat
jo sar paTaktā guzartā hai jū-ba-jū kyā hai

me.ār-e-suḳhan huuñ na koī azmat-e-fan huuñ
baḌhte hue pathrāv meñ shīshe kā badan huuñ