Tags-Badan

kaun kahtā huā zindān-e-badan se niklā
qaid meñ rakh ke bhī ham se ye vafā chāhte haiñ

badan kī aañch se sañvlā ga.e haiñ pairāhan
maiñ phir bhī sub.h ke chehre pe shaam likhtā huuñ

maiñ us kī ragoñ meñ lahū ban ke dauḌūñ
vo mere badan meñ rihā.ish kare hai

khīñch kar le jā.egā anjān mahvar kī taraf
hai badan kā rāsta bāhar se andar kī taraf

ik ġhazal phir dastakeñ detī huī
ik tasavvur phir badan letā huā

ye shola-e-husn jaise bajtā ho sitār
har ḳhatt-e-badan kī lau meñ maddham jhankār

aatmā ham ne jalā dī ḳhud ke uupar oḌhne ko
aur phir is raakh ko apne badan par mal rahe haiñ

vo bichhaḌ gayā to pata chalā ki thā saḳht kitnā ye hādisa
gayā nuur jaise charāġh kā ki badan se aks judā huā

dekhnā rañg-e-badan yaar ke pairāhan meñ
chāñdnī duudh sī chhiTkī hai mire āñgan meñ

muflis ke badan ko bhī hai chādar kī zarūrat
ab khul ke mazāroñ pe ye elaan kiyā jaa.e

dekhtī hai juuñ hī paspā.ī pe āmāda mujhe
ruuh kahtī hai badan se be-hunar maiñ bhī to huuñ

ajab sā vahm dil pe jam gayā hai
badan saa.e se ghaTtā jā rahā hai

ab kahāñ le ke chhupeñ uryāñ badan aur tan jalā
dhuup aisī hai ki saa.e se bhī pairāhan jalā

jo ek dam meñ tamām rūhoñ ko ḳhaak kar de
badan se uḌtā huā ik aisā sharār dekhūñ

havas to nahīñ hai magar ye thī sach hai
mujhe tujh badan kī tamannā rahī hai

kahīñ se aa gayā ik abr darmiyāñ varna
mire badan meñ ye sūraj utarne vaalā thā

badan par baar hai phūloñ kā saaya
mirā mahbūb aisā nāznīñ hai

ḳhalal ik paḌ gayā nāhaq gul o bulbul kī sohbat meñ
abas kholā thā tū ne baaġh meñ ai gul badan apnā

is aañkh ne kyā hotā huā dekh liyā hai
bhauñchāl sā barpā hai ajab mere badan meñ

chhoḌ jaatī hai badan ruuh bhī jaate jaate
qaid se koī bhī puurā nahīñ chhoḌā jaatā