Tags-Badan

raat badan-dariyā meñ roz utartī hai
is kashtī meñ ḳhuub savārī kiyā karo

ab mire dūsre baazū pe vo shamshīr hai jo
is se pahle bhī mirā nisf badan kaaT chukī

azīm-tar hai mohabbat meñ ruuh kā rishta
magar badan kā ta.alluq bhī darmiyāñ niklā

maiñ chal rahā huuñ ḳhol badan kā utaar kar
ab mere rāste kā ye patthar bhī haT gayā

jo harārat hai badan meñ vo tire lams kī hai
tū mujhe gar na chhue miTTī kā tuudā ho jā.ūñ

vo ek raat kī gardish meñ itnā haar gayā
libās pahne rahā aur badan utaar gayā

maiñ ne dariyā ke havāle kar diyā hai tan-badan
maujoñ kī rau meñ ḳhamoshī se bahā jaatā huuñ maiñ

badan kā har ek uzv dil kā kiyā-karāyā bhugat rahā hai
is ik student kī ḳhatā kā itaab saarī class par hai

larazte badan
rañg kohre meñ lipTe hue

badan-sarā.e meñ Thahrā huā musāfir huuñ
chukā rahā huuñ kirāya maiñ chand sāñsoñ kā

talāsh jis nuur kī hai tujh ko chhupā hai tere badan ke andar
zuhūr-e-ālam huā usī se vo hai har ik jān-o-tan ke andar

hazāroñ tūfāñ uThā.e haiñ vaqt aane par
lahū bhī ḳhaas adā se mire badan meñ rahā

ajiib dasht-e-tamannā se thā guzar 'ḳhālid'
badan meñ reg-e-ravāñ thī safar meñ paanī thā

phir is ke ba.ad mirī raat be-misāl huī
udhar vo sho.ala-badan thā idhar meñ paanī thā

vo laḌkī yaad aatī hai
jo hoñToñ se nahīñ puure badan se baat kartī thī

ye hijr kī hai aag mizāj us kā aur hai
ashkoñ se sho.alagī-e-badan aur baḌh ga.ī

mire badan meñ dhaḌak rahā hai taḌap rahā hai
firāq lamhoñ kā dard saarā suno ġhazāla

chāñdī ke se jin ke badan the sūraj ke se mukhḌe the
kuchh andhī galiyoñ meñ ham ne un kā bhī saaya dekhā

jaan se ho ga.e badan ḳhālī
jis taraf tū ne aañkh bhar dekhā

maiñ ek raat mohabbat ke sā.ebān meñ thā
mirā tamām badan ruuh kī kamān meñ thā