Tags-Badan

dam-e-bismil ye kis ke ḳhauf se ham pī ga.e aañsū
ki har zaḳhm-e-badan se ḳhuun kā dariyā nikal aayā

koī dhamākā koī chīḳh koī hañgāma
lahū badan kā lahū kī shabāhateñ māñge

sitāra mū-e-badan ruḳh gulāb kaise huā
tumhārā jism havas kī kitāb kaise huā

jo din Dhalte hī rozīna badan par ḳhushnumā chādar chaḌhā kar apne hisse kī muñDeroñ se jhalaktī haiñ
Dhalaktī chhātiyoñ ko ik adā-e-be-niyāzī se havas ke nīlgūñ bāzār meñ nīlām kartī haiñ

hamāre jism o ruuh ko surūr de ga.ī vahī
nasīm-e-ḳhush-gavār jo tire badan se aa.ī hai

har ek ke raaz se vāqif ho kah rahe haiñ sabhī
mire badan meñ koī dāstāñ talāsh karo

ThiThur gayā hai badan sab kā barf-bārī se
dahaktā kholtā ātish-fishāñ talāsh karo

maze kī niiñd ik lambī sī jhapkī
badan terā mirā bistar khule to

girnī hī thī ik roz ye dīvār badan kī
ye raah kā patthar bhī haTāne ke liye thā

ā.īñe le kar kahāñ tak ham sarāboñ ke safīr
dhuup ke sahrāoñ meñ DhūñDeñge ḳhvāboñ kā badan

raat hai yā sañg-e-marmar kā muqaddas maqbara
jis ke andar dafn hai do māhtāboñ kā badan

koī pahnātā nahīñ be-dāġh lafzoñ kā libās
kab se uryāñ hai mohabbat kī kitāboñ kā badan

mutriba ne is tarah chheḌe kuchh armānoñ ke taar
kas gayā añgḌā.ī lete hī rubāboñ kā badan

'prem' āḳhir sub.h-e-nau kholegī kab band-e-qabā
jhāñktā hai chilmanoñ se āftāboñ kā badan

yuuñ lahaktā hai tire nau-ḳhez ḳhvāboñ kā badan
jaise shabnam se dhule taaza gulāboñ kā badan

jab ghulā bād-e-sabā meñ tere pairāhan kā lams
aur bhī mahkā tar-o-tāza gulāboñ kā badan

sar-ba-sar vasl kī tamannā meñ
vo badan ruuh meñ utartā hai

phir us ke ba.ad hunar dekh mo.jizā.ī ke
tū is badan ko mire dast-e-ittisāl meñ rakh

nuqūsh-e-ḳhāk-e-badan ko tū muntashir kar de
mire vajūd ko phir mere ḳhatt-o-ḳhāl meñ rakh

jabīñ pe lahreñ thiiñ bhītar badan meñ tūfāñ thā
ḳhudā kā shukr hai dariyā utar gayā hai abhī