Tags-Badan

apne badan se lipTā huā aadmī thā maiñ
mujh se chhuḌā ke mujh ko batā kaun le gayā

havā zahrīlī thī par
badan meñ chal rahī thī

ab jahāñ ḳhushk zamīneñ haiñ badan haiñ banjar
ye ilāqa kabhī barsāt meñ aayā huā thā

mere badan se mas ho kar jazboñ se bebas ho kar
saaz bajātī rahtī hai bārish kuchh kuchh kahtī hai

kisī jism kā husn hai pairahan se
kahīñ pairahan ḳhud sajā hai badan se

apne badan ko chhoḌ ke pachhtāoge miyāñ
bāhar havā hai tez bikhar jāoge miyāñ

Dūbtī jaatī haiñ miTTī meñ badan kī kashtiyāñ
dekhne meñ ye zamīñ koī samundar bhī nahīñ

allāh re safā muñh nazar aatā hai badan meñ
ā.īna hai ai jaan karāmāt tumhārī

mashām-e-jāñ tirī ḳhushbū se is qadar mānūs
mahak badan kī ba-dosh-e-sabā dikhā.ī de

mire badan meñ chubh rahī thiiñ sūiyāñ sī raat bhar
sahar huī to lutf-e-iztirāb koī le gayā

Dasvāyā hai phunkārte sāñpoñ se badan ko
tab jā ke ye ik daulat-e-fan haath lagī hai

mire badan ko namī khā ga.ī hai ashkoñ kī
bharī bahār meñ kaisā makān Dhahtā hai

talab se bhī kuchh aur ziyāda milā
badan par ġhamoñ kā labāda milā

señk detā thā jo jaaḌe meñ ġharīboñ ke badan
aaj us sūraj ko ik dīvār uTh kar khā ga.ī

ā.īna dekh dekh ke kyā dekhte ho tum
chhūnā bhī yaañ nasīb tumhārā badan huā

adhar tere bin munj na bhāveñ aqīqāñ
badan tere bin niiñ hai nekā talā munj

badan pe TuuT bikharne ko hai kahīñ na kahīñ
hirās-o-ḳhauf kā saaya jo mere sar par hai

ik chādar-e-ġham badan pe le kar
dar dar phirā huuñ sardiyoñ meñ

ik aag uḌtī huī sī vahī ta.āqub meñ
badan kī raakh abhī shāyad badan ke andar hai

tire badan kī nazākatoñ kā huā hai jab ham-rikāb mausam
nazar nazar meñ khilā gayā hai sharāratoñ ke gulāb mausam