Tags-Badan

sho.ala-rū sho.ala-badan sho.ala-suḳhan sho.ala-mizāj
aa ga.e ghar meñ mire aag lagāne vaale

ḳhushbū ke bikharne meñ zarā der lagegī
mausam abhī phūloñ ke badan bāñdhe hue hai

baḌā pur-haul rasta thā
badan ke jauhar-e-ḳhufta meñ koī quvvat-e-lāhūt mudġham thī

jin kirchiyoñ se merā badan aaj lahū hai
vo TuuT ke bikhrā mirā hī shīsh-nagar thā

sham.a kī lau kyā shauq-e-baqā meñ sham.a ko chāTe jaatī hai
ḳhud ko tarastī rah jaatī hai ruuh miTā ke badan apnā

us vaqt jaan pyāre ham pāvate haiñ jī sā
lagtā hai jab badan se taire badan hamārā

merī barhana pusht thī koḌoñ se sabz o surḳh
gore badan pe us ke bhī niilā nishān thā

ba-zāhir to badan-bhar kā ilāqa gher rakkhā hai
magar andar se ham ne shahr saarā gher rakkhā hai

badan kī us ke kasāvaT hī kyā qayāmat hai
kisī libās meñ dekho ġhazab dikhā.ī de

khaḌā hai kaun ye pairāhan-e-sharar pahne
badan hai chuur to māthe se ḳhuun jaarī hai

gul-badan ke gul-e-ruḳhsār kā jo hai bulbul
us kuuñ nazāra-e-gulzār setī kyā matlab

muddat se hai libās-e-badan taar taar dost
mailā bhī hai utaar ab is ko utaar dost

us badan par ab qabā-e-shaharyārī tañg hai
jis ne chhīnā hai kafan tak har ġharīb-e-shahr kā

uḌtī hī rahī ḳhāk-e-badan tez havā meñ
ehsān ye kuchh kam to nahīñ barq-o-sharar kā

khilī hai dil meñ kisī ke badan kī dhuup 'shakeb'
har ek phuul sunahrā dikhā.ī detā hai

rakh kar ke thoḌī duur kināre pe ye badan
dariyā ke saath saath bahā jā rahā huuñ maiñ

badan kā bhed khulā hai tirā badan chhū kar
ye misra.a mujh pe vagarna kabhī khulā hī na thā

badan se jis kī thakan aaj tak nahīñ utrī
maiñ us safar pe ravāna kabhī huā hī na thā

badan par kuchh mire zāhir nahīñ aur dil meñ sozish hai
ḳhudā jaane ye kis ne raakh andar aag daabī hai

ye shīshe kā badan le kar nikal to aa.e ho lekin
kisī patthar se Takrāne meñ kitnī der lagtī hai