Tags-Badan

yuuñ nikaltī hai mirī baat dahan se us ke
jaise barsoñ kā ta.āruf ho badan se us ke

ragoñ meñ gardish-e-ḳhūñ kā ġhulām Thahrā hai
na us badan kā kabhī mujh se ehtirām huā

badan se aage jo baḌhtā nahīñ tabīb mire
so dil ke zaḳhm kī jānib tirī nazar kam hai

dil dhaḌaktā hai to uThtī haiñ badan meñ Tīseñ
ishq ne bāñdh ke maarā hai, ḳhudā jāntā hai

din-ba-din ab lutf terā ham pe kam hone lagā
yā to thā vaisā karam yā ye sitam hone lagā

mujhe milā hai vahāñ apnā hī badan zaḳhmī
kahīñ jo tiir se ghāyal koī hiran dekhā

badan pe jis ke sharāfat kā pairahan dekhā
vo aadmī bhī yahāñ ham ne bad-chalan dekhā

khilaune haiñ miTTī ke ham sab yahāñ par
haqīqat yahī hai badan kuchh nahīñ hai

lahū merī nasoñ meñ bhī kabhī kā jam chukā thā
badan par barf ko oḌhe nadī bhī so rahī thī

phir vahī uktāhaTeñ hoñgī badan chaupāl meñ
umr ke qisse meñ thoḌī sī javānī aur hai

jaane kis gul-badan kī yaad aa.ī
fasl-e-gul meñ udaas baiThe the

ishq ko darmiyāñ na laao ki maiñ
chīḳhtā huuñ badan kī usrat meñ

alfāz lab-o-gesū-o-ruḳhsār haiñ us ke
ġhazloñ kī qabāoñ meñ chhupā phūl-badan hai

bistar-e-gul se munaqqash jo huā us kā badan
tan-e-nāzuk pe vo phul-kārī kī chipkan samjhā

ye aur baat hai ki barhana thī zindagī
maujūd phir bhī mere badan par libās thā

ye sard raat nigal legī sā.atoñ kā vajūd
jalā.eñ shāḳh-e-badan aur istifāda kareñ

zamāne tujh se tauba kar rahā huuñ
badan kā rañg niilā kar rahā huuñ

har ik samt nāgin kī sūrat lapaktī huī tīrgī se hirāsāñ na ho
ajab kyā ki lau de uThe mere lams-e-farozāñ se terā sulagtā badan

mohabbat kā shikasta-pan nazar kyā aa.e bāhar se
ye dīmak to badan ko chāTtī rahtī hai andar se

āsān nahīñ hai ye safar ruuh kā 'saurabh'
haa.il hai tirī raah meñ ik dasht-e-badan bhī