Tags-Badan

to bach raheñgī barahna badan kī sauġhāteñ
mohabbatoñ se agar dūriyāñ nikālī jaa.eñ

sar-e-lams-e-badan jo lazzateñ thiiñ
ḳhatā ke batan meñ jo kaif sā thā

chamak kaisī badan se phuuT niklī
hamāre haath meñ kis kā sirā thā

mire ḳhayāl ke saa.e tire badan ke aks
pukārte haiñ mulāqāt kī hadoñ meñ aa

phuul hairat se hameñ dekhā kiye vaqt-e-visāl
gul-badan ke saath 'āzar' gulistāñ kī sair kī

thak gayā thā maiñ badan meñ rahte rahte ek din
bhaag niklā aur jā kar āsmāñ kī sair kī

amānat ye bhī lauTā.ī hai us ko
badan kā bojh barsoñ Dho chukī huuñ

to mirī jaañ hai na rah duur ki ab zehn mirā
kyuuñ hai zinda ye badan mujh se sabab māñge hai

hai nau-javānī meñ zo.af-e-pīrī badan meñ ra.asha kamar meñ ḳham hai
zamīñ pe saaya hai apne qad kā ki jāda-e-manzil-e-adam hai

saare chaqmāq-badan aa.e the tayyārī se
raushnī ḳhuub huī raat kī chiñgārī se

hamārī aañkh meñ nokīle kāñTe
aur badan meñ

badan gul chehra gul ruḳhsār gul lab gul dahan hai gul
sarāpā ab to vo rashk-e-chaman hai Dher phūloñ kā

havā-e-jāñ kā kyā miyāñ uThā ga.ī uḌā ga.ī
jame na the badan meñ ham ki phir se gard ho ga.e

tarz-e-iz.hār meñ koī to nayā-pan hotā
dard rañgīn badan shīshe kā bartan hotā

lahū meñ utartī rahī chāndnī
badan raat kā kitnā ThanDā lagā

tire badan ke paanī se
maiñ sūraj chamkā.ūñgā

kahne lage sab aaj savā neze par sūraj āye.gā
jis din maiñ ne mom kā kurtā apne badan par pahnā to

jo ḳhushbuoñ ke thapeḌe badan se Takrā.eñ
to 'aslam' aise meñ kab tak khaḌā rahe hai koī

damak rahā thā bahut yuuñ to pairahan us kā
zarā se lams ne raushan kiyā badan us kā