Tags-Badan

kyā bhūlne degī vo mujhe rāt-kī-rānī
vo zulf vo ḳhushbu-e-badan yaad rahegī

hoñToñ se piyeñ chāhe nigāhoñ se churā.eñ
zālim tirī ḳhushbu-e-badan kam nahīñ hotī

himāla ke nokīle badan se phisaltī huī chanchal būñdeñ
us ke qadmoñ pe jā girīñ

vasf afshāñ kā hai kis sīm-badan ke likhnā
kāġhzī ham ko hai darkār zar-afshāñ kāġhaz

aur kisī sāhil par jā kar ubharūñgā ek aur badan meñ
miTTī chhoḌ rahā huuñ maiñ mujh ko dariyā meñ utarne denā

kamar dhokā dahan uqda ġhazāl āñkheñ parī chehra
shikam hiirā badan ḳhushbū jabīñ dariyā zabāñ iisā

karam kī bhiik kahāñ qātiloñ kī bastī meñ
badan kā ḳhol uThāo lahad meñ so jaao

maiñ bhī dekhūñ merā qātil kaun hai
Dhak na de merā badan chādar uThā

jhulas rahā hai badan
mirī haDDiyāñ pighalne lagī haiñ

karūñ shikva na kyuuñ charḳh-e-kuhan se
ki furqat Daalī tujh se gul-badan se

vo badan sahrā baḌhā detā hai pahle merī pyaas
aur ban jaatā hai phir āb-e-ravāñ mere liye

ragoñ meñ taptī huī ḳhushbueñ machalne lagīñ
malā badan pe na.e mausamoñ ne sandal phir

huā hai qat.a masāfat kā silsila jaarī
maiñ ruk gayā to badan TūTne lagā merā

kisī kī khoj meñ niklā thā be-irāda maiñ
badan niDhāl thā sar ghūmtā huā merā

shab kuchh aise chalī pavan ḳhālī
kar ga.ī ruuh se badan ḳhālī

ajiib rañg kisī kī nazar se chhiTke haiñ
badan meñ phail rahī hai dhanak mohabbat kī

is badan par bhī mirā kaam dikhā.ī degā
aur vo kaam ki jaise koī shahkār huā

phūloñ se badan Dūbte dekhe ga.e akasr
is bahr meñ terā nahīñ patthar ke sivā kuchh

sub.h hone ko hai 'qamar' sāhab
ik badan se nikal rahā hai badan

husn-e-pur-nūr se lipaTne ko
pāgaloñ sā machal rahā hai badan