Tags-Badan

damak rahā thā bahut yuuñ to pairahan us kā
zarā se lams ne raushan kiyā badan us kā

tujh tak guzar kisī kā ai gul-badan na dekhā
bād-e-sabā ne ab tak terā chaman na dekhā

uryāñ na vo nahāyā hammām ho ki dariyā
chashm-e-hubāb ne bhī us kā badan na dekhā

mailā ho rañg us kā gar chāñdnī meñ nikle
chashm-e-falak ne aisā nāzuk-badan na dekhā

vo khanakte gungunāte jhūmte gaate badan
ahd-e-pīrī meñ javānī ham ko yaad aa.ī bahut

thake to yuuñ ki hameñ aarzū thī saa.e kī
sa.ūbatoñ se safar kī badan niDhāl na thā

pahlī baar maiñ kab takiye par sar rakh kar soī thī
un ke badan ko DhūñDā thā

sochegā zehan saare masā.il ke hal magar
pahle badan kī aag bujhā lene dījiye

fazā ki haath meñ rakh kar uḌaan kī ḳhushbū
badan pe le ki maiñ utrā thakān kī ḳhushbū

duur se takte rahe nañge badan
ho ga.e show-case meñ maile libās

qarīb-e-shahr pahuñch kar ġhubār-e-rāh na jhaaḌ
thake badan pe safar kā nishān rahne de

kisī badan kī sayāhat niDhāl kartī hai
kisī ke haath kā takiya thakān khīñchtā hai

gūñjtā hai badan meñ sannāTā
koī ḳhālī makān ho jaise

dam agar niklā badan se phir baḌī taskīn hai
ḳhaak patthar ho ke jamtī hai jo Taltī hai havā

zaḳhm lagte hī rahe rūh-o-badan par itne
nahīñ ma.alūm ki ab dard kidhar rahtā hai

jo ek ho to ham us ko ro.eñ hue haiñ dushman badan ke ro.eñ
hameñ to har tār-e-āstīñ par gumān hai mār-e-āstīñ kā

jinheñ nasīb huī hai tire badan kī nasīm
mahak rahe haiñ zamīñ par vo gulsitāñ ban kar

rañj meñ lipTā rahā mahtāb kā ġhamgīñ badan
raat Tairis par koī sajde maiñ royā zār-zār

sham.eñ mukāshfāt-e-badan kī jalānī thiiñ
sab ma.arifat ke tār-e-nazar kaaT Daale haiñ

baiThī rahe usī qafas-e-unsarī meñ ab
teġh-e-badan ne ruuh ke par kaaT Daale haiñ