Tags-Badan

dhīre dhīre badal rahe haiñ ḳhayāl
rafta rafta badal rahā hai badan

kis kī ḳhvāhish meñ jal rahā hai badan
mom jaisā pighal rahā hai badan

sub.h hone ko hai 'qamar' sāhab
ik badan se nikal rahā hai badan

sej pe khil rahe haiñ vasl ke phuul
raat pe itr mal rahā hai badan

kaise gulfām kahūñ, kaise sitāra samjhūñ
vo badan aur hī miTTī kā banāyā huā hai

āftāb kā paikar ban gayā badan apnā
raushnī meñ saa.e kā sehr TūTtā paayā

maiñ hī maiñ huuñ aur badan ke ġhaar meñ koī nahīñ
kar diyā tanhā sagān-e-dahr ne kitnā mujhe

bhīgā huā libās badan bhī jalā.egā
us se kaho ki sar se vo gāgar utaar de

badan pe koī zarā hai na haath meñ talvār
aur ashk-zār meñ sadiyoñ ke undulus kā safar

letā huuñ saañs bhī to bhaTaktā hai tan-badan
rag rag meñ ek nok samā.ī huī sī hai

binā badan ke ta.alluq bachā nahīñ sakte
yahī jo rasta bachā hai to koī baat nahīñ

badan shīshe kā banvāne se pahle
mire hāthoñ ke patthar dekh lenā

vahī-e-badan na utrī us kī hamāre dil par
ham sirf us kī gard-e-shān-e-nuzūl laa.e

ai āñsūo tumhārī zarūrat hai ab mujhe
kuchh mail to badan kā nahāne se kaT gayā

utar ke ruuh kī gahrā.iyoñ meñ ham har roz
ḳhud apnī qabr meñ apnā badan utārte haiñ

shaam ke aadhe badan par the shafaq ke kuchh graph
din churāne par tulā thā raat kā tiira lihāf

dosh-e-tūfāñ se koī mauj bulātī hai mujhe
reza reza hai badan ab use chun luuñ to chalūñ

kaun guzrā thā mehrāb-e-jāñ se abhī ḳhāmushī shor bhartā huā
dhund meñ koī shai juuñ damaktī huī ik badan sā badan se ubhartā huā

bachā bachā ke ghanī chhāñv ko tirī ḳhātir
tamām umr badan ke shajar meñ rakkhā hai

badan pe sab ke qabā.eñ thiiñ surḳh āñkhoñ kī
ajab tarah se ḳhizāoñ meñ gul-e-ezār ga.e