Tags-Badan

lapak to sho.ala kī fitrat hai phir bhī kyā kiije
ki is meñ phuul sī rañgat tere badan kī hai

lahū lahū aarzū badan kā lihāf hogā
vo kitnā buzdil hai aaj ye inkishāf hogā

kabhī merā badan hī thā yahāñ par
magar ab dil kī duniyā bhī yahīñ hai

ThiThure hue badan ko harārat na mil sakī
chhat par chaḌhe to dhuup ke saa.e simaT ga.e

ḳhutan ḳhutan thī shalañg-e-ġhazāl mere liye
badan badan mirā nashsha subū subū maiñ thā

to pal bhar meñ nadārat gum sabhī duniyā jahāñ aalam
maiñ us se aur vo mujh se jab badan-ālūd hotā hai

ye nazākat kahāñ ye lutf kahāñ
hai saman ko jo us badan kī hirs

rāt-bhar chāñd kī ThanDak meñ sulagtā hai badan
koī tanhā.ī ke dozaḳh se nikāle mujh ko

phir badan meñ thakan kī gard liye
phir lab-e-jū-e-bār haiñ ham log

har ik samt nāgin kī sūrat lapaktī huī tīrgī se hirāsāñ na ho
ajab kyā ki lau de uThe mere lams-e-farozāñ se terā sulagtā badan

badan ke suune khañDar meñ kabhī jalā mujh ko
maiñ terī ruuh kī zau huuñ na yuuñ bujhā mujh ko

puure badan se qāfile harakat meñ aa ga.e
rānoñ meñ surḳh aab kī sāzish bidak uThī

vo mauj-e-mai-kada-e-rañg hai badan us kā
ki haiñ talātum-e-mai se subū uchhalte hue

mirī nigāh meñ din hai mire badan meñ hai raat
mirī kitāb adhūrī paḌī hai barsoñ se

badan kā saarā lahū māñgtā hai vo ik lafz
nigāh zehn kī jis par Tikī hai barsoñ se

har ek ahd meñ jo sañgsār hotā rahā
lahū lahū maiñ usī harf ke badan meñ huuñ

badan phir se ugā legī ye miTTī
ki maiñ ne jaañ abhī haarī nahīñ hai

ba-rāh-e-jism hai saarā tasavvuf
badan suufī hai braham-zhārī nahīñ hai

ruuh ko ruuh se milne nahīñ detā hai badan
ḳhair ye biich kī dīvār girā chāhtī hai

sajegī mahfil-e-yārāñ badan sīmābī jūmeñge
kareñge raqs paimāne sitāro tum to so jaao