Tags-Badan

nazar ko bhaa.e jo manzar pahan ke niklā hai
dhanak vo apne badan par pahan ke niklā hai

baazū chhuā jo tū ne to us din khulā ye raaz
tū sirf rañg-o-bū hī nahīñ hai badan bhī hai

maanā ki rañg rañg tirā pairahan bhī hai
par is meñ kuchh karishma-e-aks-e-badan bhī hai

ban-mānus ke kaale badan par
hiire chamakte haiñ

ḳhaak ho jā.egā badan 'ātish'
hoñge ik din dhuāñ ye jism o jaan

kabhī to sard lagā dopahar kā sūraj bhī
kabhī badan ke liye ik karan ziyāda huī

mirā buḌhāpā mirī ruuh kī talāsh meñ hai
mirī javānī badan ke lavāzimāt meñ gum

kaun batlā.e tujhe ai mire ham-zād 'nabīl'
tere ham-rāh jo ik aur badan hai, maiñ huuñ

vaqt kī aañkh meñ sadiyoñ kī thakan hai, maiñ huuñ
dhuul hote hue rastoñ kā badan hai, maiñ huuñ

bahār dard bharā iqtibās chhoḌ ga.ī
har ik shajar kā badan be-libās chhoḌ ga.ī

jab zarā sā vaqt guzrā
aql ke tāroñ kī jumbish se badan jaagā

us ke badan ke sīmīñ-pan kā ek tasavvur thā ki achānak
lams ne baḌh kar Thokar khaa.ī chāñd chamak kar Duub gayā

thā chehra yaḳh-zada jazbāt kī hasīñ tasvīr
badan kashish kā muraqqa.a sarāb-āsā thā

aaj us badan pe bhī nazar aa.e talab ke daaġh
dīvār par bhī naqsh vafā ne banā.e haiñ

kuchh ayaañ ho na sakā thā tirī āñkhoñ jaisā
vo badan ho ke barahna bhī ġhilāfī Thahrā

tire badan kī mahak hī na thī to kyā rukte
guzar hamārā ka.ī baar yuuñ to ghar se huā

mahak uThā hai merā badan bhī
ḳhushbū meñ vo rahtā hogā

ashiyā kī lazzatoñ meñ aTaktā huā badan
aur ruuh kā khiñchāv hai ban-bās kī taraf

us kā badan jhukā huā patthar kī bench par
apne qadam bhī muḌte hue ghaas kī taraf

hotī hai zindagī kī harārat ragoñ meñ sard
sūkhe hue badan pe ye chamḌā kasā bhī dekh