Tags-Badan

farāham kar badan kī raushnī apnī ki mujh ko
rafū honā hai aur ye kaam hai bīnā.ī vaalā

maiñ us ke saare naqā.is use batā dūñgā
anā kā apne badan se judā ġhilāf kare

kuchh safar kī thakan se badan chor thā kuchh zamīñ saḳht thī āsmāñ duur thā
kuchh tirī zulf ke saa.e bhī the ghane phir yahī saa.e dīvār bante ga.e

mahak rahā hai badan saarā kaisī ḳhushbū hai
ye tere lams kī tāsīr hai ki jaadū hai

rakhtā na kyuuñ maiñ ruuh o badan us ke sāmne
vo yuuñ bhī thā tabīb vo yuuñ bhī tabīb thā

mahak lahū kī thī yā tere pairahan kī thī
mire badan se hayūlā sā ek lipTā thā

kabhī-kabhār use dekh leñ kahīñ mil leñ
ye kab kahā thā ki vo ḳhush-badan hamārā ho

vo badan jāduī piTārī hai
har kahīñ ik kamāl rakkhā hai

āñkhoñ kī chamak mauhūm huī lau dete badan afsurda hue
dar aa.ī hai 'qaisar' ghar meñ mire ye kaisī rutoñ kī sard havā

pighal ga.ī haiñ achānak ġhamoñ kī zanjīreñ
gire haiñ dhuup ke neze badan churā.e hue

sirf dil hī ko jalānā to koī baat nahīñ
ishq ik aag agar hai to badan tak pahuñche

sarishk rañg na baḳhshe to kyuuñ ho bār-e-mizha
lahū hinā nahīñ bantā to kyuuñ badan meñ rahe

apne badan ko sūrat aisī nazr-e-salīb-e-zulm karo
sone kī ma.asūm salībeñ sīnoñ par laTkāo to kyā

ulajh rahā hai tirī bū-e-pairahan se badan
ki phuul halqa-e-bāzū kā kaam karne lagā

saḌak saḌak mahak rahe the gul-badan saje hue
thake badan ik ik gale kā haar le ke chal diye

guzar rahī hai añdhere meñ us badan par kyā
na khul sakegī yahī chīstāñ mire pīchhe

zehn rahtā hai badan ḳhvāb ke dam tak us kā
phir vahī rañj vahī ḳhema-e-ġham tak us kā

nikhre to jagmagā uThe bikhre to rañg hai
sūraj tire badan kā baḌā shoḳh o shañg hai

halāl rizq kā matlab kisān se pūchho
pasīna ban ke badan se lahū nikaltā hai

banā.e jaatā thā us ko hasīñ na jaane kaun
badan vo phuul na thā aur nikhartā jaatā thā