Tags-Badan

bas ek raat se kaise thakan utartī hai
badan ko chāhiye ārām kuchh ziyāda hī

khāyā thā kis ke haath se 'ehsās-jī' ne paan
ḳhūn-e-badan sab us kī bas ik piik meñ milā

hone lagtī hai dil-o-jāñ meñ jalan raat Dhale
jab bhī lau dete haiñ ḳhvāboñ ke badan raat Dhale

kabhī to chheḌ koī saaz koī naġhma-e-jāñ
kabhī to apne badan se utaar sannāTā

badan se rishta-e-jāñ mo'tabar na thā merā
maiñ jis meñ rahtā thā shāyad vo ghar na thā merā

bāñkoñ ko bāñkpan ko milāo na ḳhaak meñ
tan tan ke yuuñ na apnā badan dekhte chalo

kabhī kabhī is pighalte lohe kī garm bhaTTī meñ kaam karte,
ThiThurne lagtā hai ye badan jaise saḳht sardī meñ bhun rahā ho,

raat badan yuuñ lau dete the jaise sandal jaltā ho
lekin dil-e-dīvāna chāhe aur bhī kuchh ho visāl ke ba.ad

hūrāñ na kareñ ḳhuld ke gulbun kā nazārā
jab sīm-badan apne ko gul-posh kare tū

uThā.e phirtā huuñ be-shaḳhsiyat badan apnā
aur apne gum-shuda chehre ko DhūñDhtā huuñ maiñ

kyā badan hogā ki jis ke kholte jaame kā band
barg-e-gul kī tarah har nāḳhun mo.attar ho gayā

āzād nahīñ zehn abhī fikr-e-badan se
niklā nahīñ insān abhī apne gahan se

ajiib baat hamārā hī ḳhuuñ huā paanī
hamīñ ne aag meñ apne badan bhigo.e the

ḳhushbū mire badan se ḳhud aa kar lipaT ga.ī
'mohsin' ye kis dayār se maiñ ne guzar kiyā

badan kī qaid meñ chīḳheñ na ghuT ke mar jaa.eñ
sisakte karb ko kyuuñ tum ne kar diyā ḳhāmosh

sākin hai koī aur vatan aur kisī kā
ye ruuh kisī kī hai badan aur kisī kā

hisār-e-dīd meñ jaagā tilism-e-bīnā.ī
zarā jo lau tirī sham-e-badan kī tharrā.ī

hameñ Darā.egī kyā raat ḳhud hai sahmī huī
badan to jāgte rahte the ab ke sar jaage

baḌā surḳhāb par niklā badan kā ḳhūñ-chakāñ rahnā
shafaq sayyāh kī lāzim thī rañgat arġhavānī ho

nashist-e-rūh meñ pākīzgī hai shart magar
badan kī bazm meñ bas ḳhush-libās honā hai