Tags-Badan

ḳhudā havas se bachā.e magar ka.ī din se
tire badan pe bhī ham iḳhtiyār chāhte haiñ

umr-safar jaarī hai bas ye khel dekhne ko
ruuh badan kā bojh kahāñ tak kab tak Dhotī hai

maiñ muntazir huuñ kisī aise vasl kā jis meñ
mire badan pe tire jism kā libās rahe

badan meñ jiite jī jo mar ga.e the
vo apnī ruuh meñ zinda hue haiñ

badan meñ rañg bhare lahlhā rahe haiñ charāġh
mahak rahī hai fazā muskurā rahe haiñ charāġh

bujhī nahīñ mire ātish-kade kī aag abhī
uThā nahīñ hai badan se dhuāñ kahāñ gayā maiñ

gul-badan ḳhāk-nashīnoñ se pare haT jaa.eñ
āsmāñ ujlī zamīnoñ se pare haT jaa.eñ

badan ko chhoḌ ke terī talāsh meñ niklā
na rok pā.eñge raste meñ bahr-o-bar mujh ko

maiñ aa rahā huuñ abhī chuum kar badan us kā
sunā thā aag pe bosa raqam nahīñ hotā

maiñ reza reza badan kā uThā rahā huuñ 'adīm'
vo toḌ hī to gayā apnī iltijā se mujhe

rachā huā hai badan meñ abhī surūr-e-gunāh
abhī to ḳhauf nahīñ aa.egā sazā se mujhe

havā ne kar diyā pāmāl raushnī kā badan
charāġh-e-bām kā koī pata nahīñ miltā

badan ko chhū leñ tire aur surḳh-rū ho leñ
bikharnā hī hai to ham kyuuñ na mushkbū ho leñ

huā badan mirā dushman adū huī mirī ruuh
maiñ kis ke daam meñ aayā havas-nishāna huā

kahāniyoñ ne zarā khīñch kar badan apne
haram-sarā se bulāyā hameñ vatan apne

ġhadar ke phuul sajātī haiñ aise bāloñ meñ
sambhāl saktī hoñ jaise bhare badan apne

juzv-e-badan banegā to bāhar bhī aa.egā
ye zaḳhm thoḌī der se hazrat ubūrnā

badan ko chhoḌ hī jaanā hai ruuh ne 'āzar'
har ik charāġh se āḳhir dhuāñ nikaltā hai

qalam sifat meñ pas-az-marātib badan sanā meñ tirī khapāyā
badan zabāñ meñ zabāñ suḳhan meñ suḳhan sanā meñ tirī khapāyā