Tags-Aah

balā.eñ kitnī bhī aa.eñ sar par 'ra.īs' ġham kī na kiije shohrat
ye āh-o-zārī ye shor-e-mātam koī sunegā to kyā kahegā

jab na kuchh bas chal sakā apnā to phir hasrat se haa.e
dekh kar muñh ko tire ik aah bhar kar rah ga.e

kal jo tum īdhar se guzre ham nazar kar rah ga.e
jī meñ thā kuchh kahiye lekin aah Dar kar rah ga.e

fuġhāñ kartī hai bulbul yaad meñ gar gul ke ai gulchīñ
sadā ik aah kī aatī hai jab ġhunche chaTakte haiñ

top-ḳhāne siiñ hamārī aah ke
qil.a-e-dil dhol-dhānī ho gayā

mirī āh-o-fuġhāñ kuchh bhī nahīñ hai
jale dil kā dhuāñ kuchh bhī nahīñ hai

dil meñ agar na ishq-o-mohabbat kī chaah ho
naala na dard ho na fuġhāñ ho na aah ho

ḳhudī se kaam le taqdīr shāyad kaam aa jaa.e
hujūm-e-ġham meñ 'fā.iq' shorish-e-āh-o-fuġhāñ kab tak

āḳhir to ba.ad us ke hai yaas se ummīd
jo kuchh ham apnī aah kī tāsīr kar chuke

ik āh-e-dil-nashīñ se vo but munfa.il huā
vallāh kyā nadāmat uThā.ī tamām shab

jañg-jūī kyā kahūñ us kī ki kal-parsoñ meñ aah
sulh Tuk hone na paa.ī thī ki jhagḌā paḌ gayā

kyuuñ paḌā dam toḌtā hai bistar-e-ġham par dilā
aah kis be-dard ke milne meñ toḌā paḌ gayā

hamāre āh-e-tīr-e-be-kamāñ ne ḳhāna-e-dil se
ye ruḳh pherā ki tā-bām-e-falak bāñdhā sutūnā hai

kabāb-e-dil agarche soḳhta hai chakh to ai kaifī
ye añgāroñ par āh-e-ātishīñ ne ḳhuub bhūnā hai

haa.e kam-zarfī-e-dil tū ne kahīñ kā na rakhā
aah ne kah diyā ta.azīr bahut bhārī hai

koī pattā nahīñ hiltā hai na khultī hai zabāñ
aah phir se kisī tūfān kī tayyārī hai

kabhī ai ashk-e-tar āñkhoñ se Dhal paḌ
kabhī ai āh-e-dil muñh se nikal paḌ

nikalnā ho dil se dushvār kyuuñ
ye ik aah hai is kā paikāñ nahīñ

dard-e-dil kitnā pasand aayā use
maiñ ne jab kī aah us ne vaah kī