Tags-Aah

is musībat se shab-e-furqat kaTī
paañv piiTe aah kī naala kiyā

tirā ġham hai daulat-e-dil tirī use āñsuoñ meñ luTā na de
vahī aah naqd-e-hayāt hai jise lab pe lā ke gañvā na de

furqat meñ yaad aa.e jo lutf-e-shab-e-visāl
ik aah bhar ke jānib-e-gardūñ nigāh kī

ham vo the dil hī dil meñ kiyā zabt-e-rāz-e-ishq
sadme uThā ke mar ga.e muñh se na aah kī

vo mujh se kah rahe haiñ ishāroñ meñ dekhnā
sab taaḌ jā.eñge sar-e-mahfil jo aah kī

ab faqat āh-o-zārī hai dil meñ
ik na.ī jañg jaarī hai dil meñ

laakh māshūq haiñ jahāñ meñ magar
aah vo naaz vo adā hī nahīñ

shikva na ho tasalsul-e-āh-o-fuġhāñ rahe
vo chāhte haiñ aag na bhaḌke dhuāñ rahe

aah vo din ga.e ki ham bhī 'asar'
dil ko apne sambhāl rakhte the

aah kī nahīñ tāqat taab nahīñ hai naale kī
hijr meñ tire zālim kyā hī nā-tavānī hai

'jur.at' hamārī baat pe aayā na yaañ tū aah
kyā jāniye kisī kī vo kis baat meñ lagā

aah ye daur ki jis meñ lab-o-ruḳhsār bike
dast-e-fitrat ke banā.e hue shahkār bike

tumhāre tīr-e-nazar ko kisī ne kuchh na kahā
hamārī aah ko haiñ dāstāñ banā.e hue

mujh ko nahīñ aah kā bharosa
ya.anī ki ye be-asar bahut hai

utnī hī baat ke kahne meñ ki ik bosa do
aah ai shoḳh jo aise hī gunāhgār hue

āh-o-zārī chhoḌ apnī zaat se bāhar nikal
qahqahe kī guuñj ban kar āsmāñ par phail jā

dil kī taraf kuchh aah se dil kā lagāo hai
Tak aap bhī to aa.iye yaañ zor baav hai

hameñ kuchh ishq ke mafhūm par hai tabsira karnā
ik āh-e-sard ko unvān-e-sharah-e-ġham banāte haiñ

jī Dhahā jaa.e hai sahar se aah
raat guzregī kis ḳharābī se

ho ga.e maġhrūr mujh ko āshiq apnā jaan kar
haa.e is dil kā burā ho aah ne dhokā diyā