Tags-Aah

aah kartā huuñ to barham ke liye hote ho tum
dard-mandān-e-mohabbat kā yahī dastūr hai

kiyā hai maiñ ne zabt-e-āh jis dam
anī barchhī kī siine meñ gaḌī hai

aah ye ġhār-e-halākat ye diye kā mahbas
umar apnī inhī tārīk makānoñ meñ kaTī

āh-e-pur-soz kī tāsīr burī hotī hai
ḳhush raheñge na ġharīboñ ko satāne vaale

khīñch pīchhe ko qadam aah maiñ yaañ tak royā
ki mire aage 'baqā' dur kā ik ambār lagā

yuuñ dard ba-jān-o-dil samāyā
har nāla-o-āh kārgar hai

sote meñ koī aah bharī to hogī
siine meñ koī huuk uThī to hogī

hai dāġh-e-ishq se raushan aur āh-e-sard se sard
hamāre dil kā to ḳhas-ḳhāna be-charāġh nahīñ

chheḌ ai dil ye kisī shoḳh ke ruḳhsāroñ se
khelnā aah dahakte hue añgāroñ se

uThā ke aañkh kise dekhne kī taab hai aah
nashist-e-yār agarche baḌe dikhāv pe hai

kabhī daaġh khāte hī aah kī kahīñ aah karte hī ro diye
kabhī ham chaman kī havā hue kabhī ham havā kī ghaTā hue

aah us kī be-kasī tū na jis ke saath ho
haa.e us kī bandagī jis kā tū ḳhudā nahīñ

kal maiñ jo ye kahā ki kisī ke alam se aah
mar jā.iye bas aur na kuchh kaam kījiye

sho.ala-e-ishq bhaḌaktā hai to kahtā huuñ 'rasā'
dil jalāne ke liye aah ye aa.ī holī

yuuñ duud aah kā mirī gumbad bañdhā hai yaañ
chhat jaise abr-e-tīra kī tahtassamā bañdhe

lab tak jo kabhī na aa.e vo aah
ūñchī so baam ho ga.ī hai

jaan se jaane se pahle ik aah bharī hogī tū ne
shaam Dhale jo duur kahīñ ab vīrānoñ meñ gūñjtī hai

bhalā aaj zinda āh-e-dil āshiq kare paidā
ki ḳhud vo kah rahe haiñ dard kī āvāz aatī hai

aur phir aah bharī ashk bahe, sher kahe
aur phir raqs kiyā, dhuul uḌii, ḳhaak hue

ruuTh kar jab mujh se vo jaatā hai to kar zabt-e-āh
pahle to kahtā huuñ maiñ ''tū jaan ab jā yā na jaa''