Tags-Aah

bahr-e-taskīñ vo kab nahīñ aatā
e'tibār aah ab nahīñ aatā

ye aah pe laḳht-e-dil jale haiñ
yā sīḳh-kabāb bhun rahī hai

hai chaak chaak ġhuncha-e-dil aaj aah suuñ
jyuuñ chāk-e-pairahan kuuñ kiyā gul sabā ke haath

mushkil hai rok āh-e-dil-e-dāġhdār kī
kahte haiñ sau sunār kī aur ik luhār kī

ik aah dil se uThī aur laboñ pe TuuT ga.ī
kabhī kahīñ jo tirī anjuman kī baat huī

qātil kī chashm-e-tar na ho ye zabt-e-āh dekh
juuñ sham.a sar kaTe pe uThā yaañ dhuāñ nahīñ

in ke jalvoñ ne hazāroñ ko navāzā ai 'shafīq'
aah apnī be zabāñ nazroñ ko shikvā rah gayā

āñsuoñ kā poñchhne vaalā hī jab koī na ho
aah kis ummīd par āñkhoñ ko pur-nam kījiye

kabhī ban ke ishq kī rāz-dāñ kabhī ho ke aah kī dāstāñ
ka.ī tarah tere huzūr tak mire hāl-e-dil kī ḳhabar ga.ī

vo aah taar o paud ho jis kā havā-e-zulf
kartī hai ambarī o sabā.ī tamām shab

hai ham se to aah aah karnā
denā is ko asar ḳhudā se

kyā kar rahe ho zulm karo raah raah kā
kahte haiñ be-jigar hai baḌā tiir aah kā

haa.e vo ġham jo bayāñ kī had meñ aa sakte na the
qaid-o-ashk-o-āh se aage nikal kar rah ga.e

masarrat aah tū bastī hai kin sitāroñ meñ
zamīñ pe umr huī terī justujū karte

aah ai kasrat-e-dāġh-e-ġham-e-ḳhūbāñ ki mudām
safha-e-sīna pur-az-jalva-e-tā.ūsī hai

un ke āñgan meñ bhī añgāre baras jā.eñge
āh-e-sozāñ na lagā dāman-e-aflāk meñ aag

kis qadar tash.hīr-e-ġham se duur thā
chupke chupke aah bharte sabz peḌ

aah kā kis ne asar dekhā hai
ham bhī ek apnī havā bāñdhte haiñ

bashar kyā farishte jo pīTeñ DhiñDhorā to kyuuñ kar chhupe raaz kam-baḳht dil kā
idhar aah niklī hamārī zabāñ se udhar mach gayā saarī duniyā meñ hullaḌ

pher diye haiñ dil logoñ ke mālik ne kuchh merī taraf
tum bhī Tuk ai āh-o-nāla qalboñ meñ tāsīr karo