Tags-Aah

aah is dānish-kade meñ kis qadar hai qaht-e-husn
jab se aayā huuñ yahāñ bazm-e-nazar vīrān hai

yāroñ ne mire aah kahīñ kā nahīñ chhoḌā
Thokar jo lagī mujh ko to andāza huā hai

ham jigar thaam ke jab āh-e-rasā karte haiñ
ik qayāmat meñ qayāmat hī bapā karte haiñ

gar shaiḳh ne aah kī to mat bhuul
dil meñ patthar ke bhī sharar hai

shām-e-shab-e-firāq hai tākīd-e-zabt-e-āh
dil meñ uThe jo dard to phir kyā kare koī

us ne jab zaḳhm-e-dil ko zabāñ baḳhsh dī
sunñe vāloñ ne be-sāḳhta aah kī

maiñ na kahā kartā thā saaqī tishna-laboñ kī aah na le
pyaas bhī sho.ala ban saktī hai pyāsoñ ko tarsāne se

e'tibār-e-ishq kī ḳhāna-ḳharābī dekhnā
ġhair ne kī aah lekin vo ḳhafā mujh par huā

huuñ maiñ vo dil-soḳhta tāsīr-e-āh-e-garm se
gulshan-e-jannat meñ bhī daur-e-ḳhizāñ paidā karūñ

aah kī maiñ ne to bole hai hai
jī uThā 'āshiq'-e-bīmār ye kyā

tumhārī yaad jo aa.ī to de ke aah ga.ī
banā ke dard ko apnā yahāñ gavāh ga.ī

tāsīr-e-āh-o-nāla to ma.alūm haañ magar
dil kā buḳhār ḳhuub nikaltā hai aah meñ

dil-e-sozāñ kī 'jahāñdār' tire tā-ba-falak
kaun sī aah thī jo misl-e-havā.ī na ga.ī

vaañ us ko haul-e-dil hai to yaañ maiñ huuñ sharm-sār
ya.anī ye merī aah kī tāsīr se na ho

pūchhā agar kisī ne mirā aa ke hāl-e-dil
be-iḳhtiyār aah laboñ se nikal ga.ī

tamām tajraba-e-garm-o-sard-e-ishq kahāñ
kuchh ashk-e-garm huā dil kuchh āh-e-sard huā

azal kī yaad meñ maiñ garm-e-āh-e-sard huā
lagī thī choT kabhī aur aaj dard huā

jagā kar ḳhvāb-e-āsā.ish se 'bedār' aah hastī meñ
adam-āsūdgāñ ko lā ke Daalā hai tabāhī meñ

are aah tū ne ġhazab kiyā mire dil ko mujh se tuḌā liyā
mirī jī ko le ke jalā diyā paḌī iḳhtilāt ye pahāḌ meñ

shorish-e-kā.enāt meñ ġham ko ḳhushī banā.e jā
hañs mire āñsuoñ meñ tū aah meñ muskurā.e jā