Tags-Aah

ajiib mushkil hai aah ai dil kaThin hai bīm-o-rajā kī manzil
qadam qadam par ye sochte haiñ kidhar na chaliye kidhar ko chaliye

ho jaa.e bakheḌā paak kahīñ paas apne bulā leñ behtar hai
ab dard-e-judā.ī se un kī ai aah bahut betāb haiñ ham

sabr se jo thaam kar rakkhī hai apne haath meñ
āñsuoñ ke kitne dariyā vaar duuñ is aah par

aah ab ḳhuddārī-e-akbar kahāñ
ho ga.ī vo bhī ġhulām-e-ārzū

zabt-e-āh-e-dil-shikan aur maiñ hazīñ
kar rahā huuñ ehtirām-e-ārzū

aah ai saudā-e-ḳhām-e-ārzū
tā-ba-kai āḳhir nizām-e-ārzū

mehr-e-qamar kā hai ab un ko gumān
āh-e-falak-sair ne ye kyā kiyā

jo dil thā vasl meñ ābād tere hijr meñ aah
banī hai shakl ab us kī ujaaḌ ban kī sī

shiddat-e-ġham aur phir tākīd-e-zabt-e-āh bhī
lekin ik majbūr-e-ulfat ko gavārā ho gayā

miliye us shaḳhs se jo aadam hove
naaz us ko kamāl par bahut kam hove

ḳhvāb ho ki bedārī-e-āh-o-nāla-o-zārī
iḳhtiyār kī had tak iḳhtiyār karnā thā

kahāñ vo āh-o-fuġhāñ dam bhī le nahīñ sakte
hameñ ye terī duā-e-bad āsmān lagī

aah ai soz-e-darūñ mere junūñ se ab tak
manzileñ sar na huiiñ bādiya-paimā.ī kī

aah ham karte haiñ ai yaar ke mahfil vaalo
donoñ hāthoñ se jigar thaam lo apnā apnā

aah meñ ai dil-e-mazlūm asar paidā kar
jis meñ saudā-e-mohabbat ho vo sar paidā kar

aah hasrat karte haiñ insāñ gunah
hashr kī jaise sazā kuchh bhī nahīñ

sach hai ba-qaul-e-hazrat-e-sayyad 'nazīr' aah
ban aatī haiñ to hotī haiñ sab bāteñ Thīk-Thīk

kyā dil ko achchhī lagtī haiñ in ḳhush-qadoñ kī aah
ye pyārī pyārī boliyāñ ye gāteñ Thīk-Thīk

jo mirī chiḌh hai usī baat kā hai tujh ko zauq
aah tū dīda-o-dānista khujātā hai mujhe

jihād-e-ġham meñ koī sust zarb merī tarah
giraft-e-maisara-e-ashk-o-āh meñ aayā