Tags-Bahana

kabhī koī vaada vafā na kar yūñhī roz roz bahāna kar
tū fareb de ke chalā gayā tirā e'tibār nahīñ gayā

kisī iid par yā basant par vo milegā umr ke ant par
maiñ ye sochtā huuñ ki ye bhī koī bahāna ho kahīñ yuuñ na ho

itnī shiddat se na mil tū ki judā.ī chāheñ
yahī qurbat tirī duurī kā bahāna ban jaa.e

huā jo din to huā us ko paas rusvā.ī
jo raat aa.ī to phir niiñd kā bahāna huā

shahīd nāz-o-adā kā tire zamāna huā
uḌāyā mehñdī ne dil chor kā bahāna huā

kisī ke haath kahāñ ye ḳhazāna aatā hai
mire aziiz ko har ik bahāna aatā hai

hameñ baḳhshe na baḳhshe daḳhl yā marzī meñ mālik kī
vagarna us kī rahmat ko to darkār ik bahāna hai

musavvirī na sahī kaam aa.ī be-hunarī
koī bahāna to un se salām kā niklā

tavānā ko bahāna chāhiye shāyad tashaddud kā
phir ik majbūr par shorīdgī kā ittihām aayā

be-hāsil chalte rahnā bhī sahl nahīñ
qadam qadam par ek bahāna lagtā hai

hamāre gaañv kī miTTī hī ret jaisī thī
ye ek raat kā sailāb to bahāna huā

jaate haiñ aap aur burā haal hai mirā
aatī jo ab to maut ko achchhā bahāna thā

missī kabhī malī kabhī gesū banā kiye
shab-bhar shab-e-visāl meñ hīla-bahāna thā

chilman kā ulaT jaanā zāhir kā bahāna hai
un ko to bahar-sūrat ik jalva dikhā jaanā

hañstī āñkheñ hañstā chehra ik majbūr bahāna hai
chāñd meñ sach-much nuur kahāñ hai chāñd to ik vīrāna hai

bahāna DhūñDte rahte haiñ koī rone kā
hameñ ye shauq hai kyā āstīñ bhigone kā

mujh se kahtā hai ki saa.e kī tarah saath haiñ ham
yuuñ na milne kā nikālā hai bahāna kaisā

jā ke ham dekh chuke band hai darvāza-e-shahr
ek raat aur ye rukne kā bahāna achchhā

vo pūchhtā thā mirī aañkh bhīgne kā sabab
mujhe bahāna banānā bhī to nahīñ aayā