Tags-Bahana

usī ravish par chalo zindagī guzār aa.eñ
sivā.e is ke kareñ harf ko bahāna bhī kyā

shikast-e-ahd par is ke sivā bahāna bhī kyā
ki us kā koī nahīñ thā mirā Thikāna bhī kyā

ḳhud apnī yād-e-farāmosh-kār meñ gum huuñ
bahāna ye hai tire intizār meñ gum huuñ

saḳht-jānī rahī bahāna hai
terā ḳhanjar hī āb-dār na thā

raste meñ 'fahīm' us kī tabī.at kā bigaḌnā
ghar jaane kā ik aur bahāna to nahīñ hai

tum se milne kā bahāna tak nahīñ
aur bichhaḌ jaane ke hiile haiñ bahut

sun ke ahvāl-e-mohabbat ko mirā bolā vo shoḳh
jaan dene kā tujhe achchhā bahāna yaad hai

tark-e-ummīd ik bahāna thā
kar chuke ye bhī sau bahāne se

jis taraf tū hai udhar hoñgī sabhī kī nazreñ
iid ke chāñd kā dīdār bahāna hī sahī

itnā itminān hai ab bhī un āñkhoñ meñ
ek bahāna aur banāyā jā saktā hai

bahāna koī nahīñ ab safar meñ rahne kā
zamīn-e-ḳhvāb tujhe pā.emāl ham ne kiyā

kyuuñ ho bahāna-jū na qazā sar se paañv tak
zālim haiñ aap kī hai adā sar se paañv tak

mujhe ma.alūm hai vo kyā shikāyat karne vaalī hai
use ma.alūm hai maiñ kyā bahāna karne vaalā huuñ

is se pahle ye bahāna to na thā aa jaate
darmiyāñ apne zamāna to na thā aa jaate

aatī hai kis tarah se mire qabz-e-rūh ko
dekhūñ to maut DhūñD rahī hai bahāna kyā

thā bahāna mujhe zanjīr ke hil jaane kā
chhoḌ dev ab to havā shauq nikal jaane kā

mujhe yaar ne aa ke jo dekhā hazīñ kahā ro.e ho maiñ ne kahā ki nahīñ
vo kahe ga.e āñkhoñ pe kyuuñ hai varam 'sharaf' un se bahāna hazār kiyā

girah-kushā.i-e-mauj-e-nafas bahāna hai
ki is bahāne se us paar ho liyā jaa.e

vo jaanā palaT kar na aanā tumhārā
na bhūlegā ye dil bahāna tumhārā

dekho kabhī tum us kā bhī aanā mire aage
jis kā na chale koī bahāna mire aage