Tags-Bahana

kitnī kam-go thī mirī jān-e-suḳhan vo ḳhushbū
baat karne kā bahāna bhī agar se niklā

ye chāñd aur sitāre to ik bahāna haiñ
kuchh aur hai jo yahāñ jagmagāne vaalā hai

kisī bhī haal meñ raazī nahīñ hai dil ham se
har ik tarah kā ye kāfir bahāna rakhtā hai

tirī chāhat bahāna hai yaqīñ kar
ba-har sūrat maiñ ḳhud ko chāhtā huuñ

mil baiThne ke vāste aapas meñ har ghaḌī
thā kuchh fareb vaañ to idhar kuchh bahāna thā

bahāna chāhiye thā jū-e-shīr-o-shīrīñ kā
koī samajh na sakā tesha-zan hī aisā thā

hameñ to ḳhair bikharnā hī thā kabhī na kabhī
havā-e-tāza kā jhoñkā bahāna ho gayā hai

ḳhāmoshī merī sāthī hai aur dekhne vaalā koī nahīñ
ai kaash kahīñ se aa jaate jiine kā bahāna koī nahīñ

sabr aayā hai hameñ ashk-fishānī se hī
mil hī jaa.e koī us ko bhī bahāna shāyad

le ke imdād kā jhūTā sā bahāna koī
mujh ko auqāt batāne vo idhar aa.egā

sukūn-e-dil ke liye ishq to bahāna thā
vagarna thak ke kahīñ to Thahar hī jaanā thā

mirī zindagī to guzrī tire hijr ke sahāre
mirī maut ko bhī pyāre koī chāhiye bahāna

huā jo din to huā us ko paas rusvā.ī
jo raat aa.ī to phir niiñd kā bahāna huā

shahīd nāz-o-adā kā tire zamāna huā
uḌāyā mehñdī ne dil chor kā bahāna huā

uThāyā us ne biiḌā qatl kā kuchh dil meñ Thānā hai
chabānā paan kā bhī ḳhuuñ bahāne kā bahāna hai

kahtī haiñ na lā pā.eñgī ye tāb-e-nazāra
āñkhoñ kā bahāna mire matlab kā nahīñ hai

yahī kaafī hai marne ke liye ye bhī bahāna hai
zarūrat kyā hai āḳhir dard-e-dil us se sivā kyuuñ ho

subūt-e-jurm na milne kā phir bahāna kiyā
ki adliya ne vahī faisla purānā kiyā

ham ko apnī ḳhabar na dāman kī
chashm-e-rahmat ko ik bahāna milā

kisī iid par yā basant par vo milegā umr ke ant par
maiñ ye sochtā huuñ ki ye bhī koī bahāna ho kahīñ yuuñ na ho