Tags-Bahana

bhuul bhī jaa.eñ tujhe zaḳhm purānā bhī to ho
jī bhī leñ jiine ko jiine kā bahāna bhī to ho

kare jo va.ada to is tarah kā ki dil ko sunte hī ho tasallī
jo sochiye phir to kaisā va.ada faqat bahāna fareb aur chhal

mujhe ai nāḳhudā āḳhir kisī ko muñh dikhānā hai
bahāna kar ke tanhā paar utar jaanā nahīñ aatā

junūñ kā koī fasāna to haath aane do
maiñ ro paḌūñgā bahāna to haath aane do

hijr-e-jānāñ meñ jī se jaanā hai
bas yahī maut kā bahāna hai

qaa.em purāne hīloñ bahānoñ pe aaj bhī
samjhe the is kā tarz bahāna badal gayā

koī sadā koī āvāza-e-jaras hī sahī
koī bahāna ki ham jaañ nisār karte raheñ

suḳhan-varī kā bahāna banātā rahtā huuñ
tirā fasāna tujhī ko sunātā rahtā huuñ

yaad karne kā tujhe koī bahāna bhī nahīñ
koī chhallā koī chauḌī hī nishānī hotī

bahāna koī to ai zindagī de
ki jiine ke liye majbūr ho jā.ūñ

tā koī bahāna tire pairoñ se na lipTe
dīvār se tasvīr haTā dī hai chalā jā

āshiqī kyā hai sach jo pūchho to
ham ko marne kā ik bahāna milā

maut hī zindagī kī manzil hai
zindagī maut kā bahāna hai

hijr-e-jānāñ meñ jī se jaanā hai
bas yahī maut kā bahāna hai

inkār bhī karne kā bahāna nahīñ miltā
iqrār bhī karne kā mazā dekh rahe haiñ

hamāre gaañv kī miTTī hī ret jaisī thī
ye ek raat kā sailāb to bahāna huā

tirī pasand se miltī nahīñ pasand mirī
yahī hai ek bahāna to mere Theñge se

ik-ādh baar to jaañ vārnī hī paḌtī hai
mohabbateñ hoñ to bantā nahīñ bahāna koī

tum se milne kā bahāna tak nahīñ
aur bichhaḌ jaane ke hiile haiñ bahut

maslahatoñ kī is bastī meñ lab khulte ye taab na thī
vaz-e-junūñ kī baat na pūchho vo bhī ek bahāna thā