Tags-Bandagi

āshiqī ho yā bandagī ke pal
apne lahje se shā.irī nikle

jhukte haiñ ham ġharaz ke liye rab ke sāmne
be-laus ab kisī kī kahāñ bandagī rahī

tajassus markaz-e-taqdīr kā qaa.il nahīñ hotā
shu.ūr-e-bandagī! begāna-e-dair-o-haram ho jā

us ke bande bandagī karte haiñ lekin ai buto
tum ḳhudā.ī kar rahe ho ye ḳhudā kī shaan hai

safar meñ hī chhupī un kī ḳhushī hai
musāfir ko masāfat bandagī hai

mizāj-e-ishq ne ādāb-e-husn apnā.e
dayār-e-ishq meñ vo rasm-e-bandagī na rahī

na tīrgī ke liye haiñ na raushnī ke liye
shab-o-sahar ke taqāze haiñ bandagī ke liye

apnī ḳhū-e-vafā se Dartā huuñ
āshiqī bandagī na ho jaa.e

jabīñ sajda karte hī karte ga.ī
haq-e-bandagī ham adā kar chale

iqrār-e-bandagī hai ḳhudā.ī kā idda.ā
ijz-o-niyāz kyā hai kamāl-e-ġhurūr hai

mirī zindagī ke ye marhale hama-ittiqā hama-bandagī
mujhe kaif un kī nazar se hai koī vāsta nahīñ jaam se

ġharq-e-ġham huuñ tirī ḳhushī ke liye
yahī sajda hai bandagī ke liye

jhukā.iye dil ko sar se pahle ki lutf hāsil ho zindagī kā
na ho agar ijz bandagī meñ to bandagī kā mazā nahīñ hai

merī jabīn-e-shauq ko dar un kā mil gayā
uTh kar kahāñ ko jaa.eñ dar-e-bandagī se ham

dard to maujūd hai dil meñ davā ho yā na ho
bandagī hālat se zāhir hai ḳhudā ho yā na ho

tumhārī be-niyāzī ko ġharaz kab hai magar merī
tamannā hai jabīn-e-shauq vaqf-e-bandagī hotī

tujhe hai shauq-e-bandagī bahisht ke ḳhayāl se
magar mirī ibādateñ savāb ke liye nahīñ

agar merī jabīn-e-shauq vaqf-e-bandagī hotī
to phir mahshūr un ke saath apnī zindagī hotī

bandagī terī ḳhudā.ī se bahut hai aage
naqsh-e-sajda hai tire naqsh-e-qadam se pahle

bandagī kā mirī andāz judā hotā hai
merā ka.aba mere sajdoñ meñ chhupā hotā hai