Tags-Bandagi

uThā chukī hai tabī.at jo bandagī ke maze
kisī ke jaur se vo baaz aa.ī jaatī hai

hama-ārzū hama-be-ḳhudī hama-bandagī hama-be-kasī
yahī chand lamhoñ kī zindagī ise kyuuñ na fursat-e-ġham kaheñ

mirī bandagī tujhe de sakegī bajā.e ma.ānī o lafz kyā
hai mire shu.ūr kī jholiyoñ meñ sivā.e ma.ānī-o-lafz kyā

kyā namāzeñ haiñ hamārī kyā hamārī bandagī
khoT niyyat meñ rahā aur sar ko ḳham karte rahe

mirī bandagī ke ye mashġhale ki ḳhudā.ī se bhī muāmle
kabhī ḳhud hī dst-e-karīm huuñ kabhī ḳhud hī dast-e-savāl huuñ

maiñ jo hāsil tire kūche kī gadā.ī kartā
bandagī kahte haiñ kis shai ko ḳhudā.ī kartā

bandagī ham ne to jī se apnī Thānī aap kī
banda-parvar ḳhair aage qadr-dānī aap kī

nārāz ho ḳhudā to kareñ bandagī se ḳhush
māshūq ruuTh jaa.e to kyūñkar manā.eñ ham

javāb us kā to shāyad falak bhī de na sake
vo bandagī jo tirī rahguzar meñ kī maiñ ne

us ke bhī sar ne paayā hai ehsās-e-bandagī
sajda meñ gar tū jaatā hai dar dekhtā nahīñ

inkār mujh kuuñ niiñ hai tirī bandagī satī
yaañ kyā hai balki hashr meñ iqrār hovegā

bandagī mujh ko to raas aa jā.egī
tū ḳhudā hone se pahle soch le

ḳhaak uḌtī jo ham ḳhudā hote
bandagī kā bhī haq adā na huā

tirī chāhat meñ jo kuchh pā liyā hai
nahīñ hāsil huā vo bandagī meñ

bandagī ham ne chhoḌ dī hai 'farāz'
kyā kareñ log jab ḳhudā ho jaa.eñ

leaderī meñ bhalā huā un kā
bandagī meñ mirā bhalā na huā

sitamgaroñ ko ibādat-guzār mat jaano
ḳhudā kī bandagī 'az.har' ḳhudā se Dartī hai

har nafas yaad hai tirī ai dost
aur manshā-e-bandagī kyā hai

bandagī kījiye magar kis kī
hai bhī duniyā meñ koī banda-navāz

naaz hai apnī bandagī pe 'hasan'
jis ko chāheñ vahī ḳhudā hogā