Tags-Bandagi

kyā mujhe paidā kiyā hai ai ḳhudā
in butoñ kī bandagī ke vāste

apnī ḳhū-e-vafā se Dartā huuñ
āshiqī bandagī na ho jaa.e

kaun sā aalam hai mālik tere aalam meñ nihāñ
kaun sajde meñ chhupā hai bandagī se māvarā

sarāpā bandagī hai kibriyā.ī
maiñ is takmīl-e-insānī ke sadqe

ḳhushā vo bāñg-e-azāñ vo tarāna-e-nāqūs
vo bandagī-e-sanam bandā-e-namāz ke saath

ye kis ke dar se ta.ane mil rahe haiñ sajda-o-sar ko
ye kis dar par hai zauq-e-bandagī badnām kyā kahiye

mohabbat meñ shikāyat kyā gila kyā
mohabbat bandagī hai bandagī hai

kyā haiñ usūl-e-bandagī ahl-e-junūñ ko kyā ḳhabar
sajda ravā kahāñ pe hai sajda kahāñ ravā nahīñ

dil hai qadmoñ par kisī ke sar jhukā ho yā na ho
bandagī to apnī fitrat hai ḳhudā ho yā na ho

takmīl bandagī na huī mujh se ai 'fanā'
jab tak dar-e-habīb pe sajda kiyā nahīñ

ham pe to pahle hī zāhir thā ma.āl-e-bandagī
pūjne jāoge jis but ko ḳhudā ho jā.egā

uThā hai jis kī latāfat se bandagī kā ḳhamīr
usī gunāh kī ismat pe jāñ-nisār kareñ

tire liye to jhukānā bhī sar ibādat hai
agar jhukā na sake dil to bandagī kyā hai

ham ḳhudā.ī kā da.avā to karte nahīñ
bandagī par bhī puure utarte nahīñ

tere aage na yārān-e-ḳhud-sar jhuke terī chaukhaT se bhāge to dar dar jhuke
us jagah dil jhuke us jagah sar jhuke bandagī ke sivā koī chārā na thā

ai mahvashān-e-shahr mirī bandagī karo
maiñ ḳhud sañvar ke aks-e-ruḳh-e-yār ban gayā

va.ada hūroñ kā ba.ad marne ke
bandagī kā silā nahīñ lagtā

bandagī bhī na mujhe raas aa.ī
aur pindār-e-ḳhudā.ī bhī nahīñ

uTho aur bandagī kar lo ḳhudā kī
guzar jaa.eñ na lamhe bandagī ke

na samjho tum mirī arz-e-niyāz ko shikva
maiñ jāntā huuñ taqāzā-e-bandagī kyā hai