Tags-Bandagi

mirī anā ne sabaq de ke ḳhud-parastī kā
chhuḌā diyā hai zamāne kī bandagī se mujhe

auj to bandagī meñ muzmar hai
hech saarī haiñ rif.ateñ baaqī

shauq jab bhī bandagī kā rahnumā hotā nahīñ
zindagī se zindagī kā haq adā hotā nahīñ

āshīqī-o-ḳhuddārī bandagī-o-ḳhud-bīnī
aarzū kī rāhoñ meñ ḳhūn-e-ārzū kiije

mire dam pe ishq meñ hai banī tujhe va.az-o-pand kī hai paḌī
mire nāsehā tujhe bandagī tirī dostī ko salām hai

kisī ke ek dard-e-bandagī se kyā milī fursat
ki dil meñ sau tarah kā dard paidā kar liyā maiñ ne

niyāz-e-ishq ko sūrat na jab koī nazar aa.ī
junūn-e-bandagī meñ ḳhud ko sajda kar liyā maiñ ne

maiñ jab chalā huuñ ba-īñ zauq-e-bandagī ai dost
qadam qadam pe mile āstāñ hazār mujhe

mirī bandagī se mire jurm afzūñ
tire qahr se terī rahmat ziyāda

piye sharāb ibādat-guzār hue ai shaiḳh
magar huzūr ye shāyān-e-bandagī to nahīñ

sitāre aa.e haiñ zarroñ kī bandagī ke liye
naved-e-sub.h mubārak hayāt raqs meñ hai

ik lazzat-e-gunāh thī kyā lazzat-e-gunāh
tā-umr raas aa.ī na phir bandagī mujhe

farhat-e-bandagī milī tābish-e-zindagī milī
dil se jo ek baar maiñ mahv-e-namāz ho gayā

dostī bandagī vafā-o-ḳhulūs
ham ye sham.a jalānā bhuul ga.e

hosh-o-havās tāb-o-tavāñ zauq-e-bandagī
ham se ye zindagī ke sahāre chale ga.e

maut se khelte haiñ ham lekin
ġhair kī bandagī se Darte haiñ

maiñ thā āvāra-o-barjasta-ḳhirām
aurāq-e-bandagī us kī panāh

ham be-niyāz baiThe hue un kī bazm meñ
auroñ kī bandagī kā asar dekhte rahe

maiñ nikal ke aa gayā huuñ tirī bandagī se aage
abhī kitnā rāsta hai mirī zindagī se aage