Tags-Barg

to vo shajar jo sadā barg-o-bār detā hai
misāl-e-āb-e-nihāñ is shajar meñ ham bhī haiñ

TuuT kar shāḳh se ik barg-e-ḳhizāñ-āmāda
sochtā hai ki guzartā huā jhoñkā kyā hai

nazdīk aa chukī hai savārī bahār kī
barg-e-ḳhizāñ-rasīda gulistāñ se duur hoñ

barg-e-hinā uupar likho ahvāl-e-dil mirā
shāyad ki jā lage vo kisī mīrzā ke haath

na un kī chhāñv meñ barkat na barg-o-bār meñ faiz
vo ḳhud-numūd jo ḳhud ko shajar samajhte haiñ

barg-o-gul-o-tuyūr sab shāḳhoñ kī samt uḌ ga.e
qasr-e-jahāñ-panāh meñ naqsh-o-nigār bhī nahīñ

na.ī rutoñ kī huā ne ajiib sāzish kī
ki mauj-e-ḳhūñ meñ hai har barg-e-gul nahāyā huā

yahāñ shajar kā shajar daav par hai nādānoñ
tumhāre lab pe vahī shāḳh-o-barg-o-bār kī baat

aayā hai jab señ baaġh taraf vo kitāb-rū
tab señ huā hai safha-e-barg-e-saman ġhalat

kyā dil-ḳharāsh kaam huā hai mire supurd
ik zard rut ke barg-o-samar chun rahā huuñ maiñ

ḳhayāl-o-ḳhvāb huā barg-o-bār kā mausam
bichhaḌ gayā tirī sūrat bahār kā mausam

farsh-e-zamīñ pe barg-e-ḳhizānī kā rañg hai
dīvār-o-dar pe naql-e-makānī kā rañg hai

ik barg-e-muzmahil ne ye spēch meñ kahā
mausam kī kuchh ḳhabar nahīñ ai Daliyo tumheñ

mire bachchoñ ko allāh rakhe in taaza havā ke jhoñkoñ ne
maiñ ḳhushk peḌ ḳhizāñ kā thā mujhe kaisā barg-o-bār diyā

khaḌā hai dasht-e-hastī meñ agarche naḳhl-e-jāñ lekin
gul-e-goyā.ī baaqī hai na koī barg-e-bīnā.ī

vo 'rām' naḳhl-e-vafā hai maiñ barg-e-āvāra
use jumūd milā hai mujhe junūn milā

guzargāh-e-nafas meñ huuñ misāl-e-barg-e-āvāra
koī dam meñ uḌā le jā.egī bād-e-fanā mujh ko

jab nahīñ shāḳh-e-chaman par to mirā naam hī kyā
barg āvāra kaho barg-e-ḳhizānī kah lo

zulm ke sāmne iḳhlās kā parda rakh do
nok-e-har-ḳhār pe barg-e-gul-e-ra.anā rakh do