Tags-Bijli

koī bijlī in ḳharāboñ meñ ghaTā raushan kare
ai añdherī bastiyo tum ko ḳhudā raushan kare

gar rañg bhabūkā ātish hai aur biinī shola-e-sarkash hai
to bijlī sī kauñde hai parī aariz kī chamak phir vaisī hī

ik āshiyāne pe bijlī girī to ronā kyā
hamāre vāste saarā jahān baaqī hai

bijlī chamak ga.ī jo hañsī meñ phaḌak ga.e
shoḳhī bharī huī hai tumhārī sarisht meñ

vo ek abr to bijlī se raat bhar laḌtā
havā ke miyān se ḳhanjar magar nikal aayā

ḳhudā tum ko vazīr-e-bijlī-o-pānī banā de
to phir tum sārafīn-e-bijlī-o-pānī se bachnā

gesu-e-mushkīñ meñ vo rū-e-hasīñ
abr meñ bijlī sī ik lahrā ga.ī

ġhazab huā jo añdhere meñ jal uThī bijlī
badan kisī kā tilismāt kuchh dikhā bhī gayā

mauj-e-taḳhayyul gul kā tabassum partav-e-shabnam bijlī kā saaya
dhokā hai dhokā nām-e-javānī is ko javānī koī na samjhe

kaun bijlī kī dhamkiyāñ sahtā
āshiyāñ ḳhud jalā diyā ham ne

jo chehre kī banāvaT se yuuñ zulfoñ ko haTātī ho
udhar kā pūchho mat ham se idhar bijlī girātī ho

parda haTā ke jab vo hasīñ muskurā.egā
bijlī hamāre hosh-o-ḳhirad par girā.egā

nasheman par nasheman is qadar ta.amīr kartā jā
ki bijlī girte girte aap ḳhud be-zār ho jaa.e

bijlī vo chiiz hī nahīñ jis se hasīñ Dareñ
kuchh dard kī chamak hai jhalak iztirāb kī

bijlī girā.eñ tuur par āvāz hī se vo
Thahre kabhī to ham se savāl-o-javāb kī

qafas meñ asīroñ pe girtī hai bijlī
chaman se jo uThte dhuāñ dekhte haiñ

sāmne se koī bijlī sī guzar jā.egī
mere andar koī haijān kiyā jā.egā

muskurāne kī adā jaise chamak bijlī kī
aan hañsne kī qayāmat lab-o-dandān parī

asīrān-e-qafas haiñ ham se pūchho qadr-e-āzādī
ki ab bijlī bhī shāḳh-e-āshiyāñ mālūm hotī hai

tumhīñ the yā vo parchhā.īñ tumhārī
abhī bijlī sī jo guzrī yahāñ se