Tags-Bijli

ye na pūchh phuul barse ki girī diloñ pe bijlī
zarā dekh aa.ine meñ kabhī apnā muskurānā

sho.aloñ se gila kaisā bijlī se shikāyat kyā
gulshan ke nigahbāñ ne har shāḳh jalā dī hai

bijlī sī ik aur girā dī zālim ne
zabt kī saarī khep jalā dī zālim ne

bijlī kaḌak rahī thī ajab ehtimām se
bachcha duā.eñ maañg rahā thā Darā huā

lipaT jaate haiñ vo bijlī ke Dar se
ilāhī ye ghaTā do din to barse

kaTe haiñ din balāoñ ke sahāre jin asīroñ ke
unheñ bijlī bhī shāḳh-e-āshiyāñ mālūm hotī hai

bachpan meñ khelte the miTTī ke ham khilaune
bijlī se chalne vaale guDDe tumheñ dilā.e

kyā mazā detī hai bijlī kī chamak mujh ko 'riyāz'
mujh se lapTe haiñ mire naam se Darne vaale

jab tumhārī kaan kī bijlī chamak kar rah ga.ī
merī āñkhoñ ne samāñ dikhlā diyā barsāt kā

parvāz kā thā shauq mujhe āsmān tak
bijlī girī to jal ga.e khetoñ ke dhaan tak

garmī-e-husn baḌhī sard huā āshiq-e-zār
sham.a ke phuul se bijlī girī parvāne par

bijlī chamkī to abr royā
yaad aa ga.ī kyā hañsī kisī kī

allāh allāh tire husn kī ik jhalak raushnī ho ga.ī az-zamīñ-tā-falak
ek bijlī sī lahrā.ī kuchh duur tak phir Thahar kar mire rū-ba-rū rah ga.ī

bijlī chamak rahī hai nasheman kī ḳhair ho
māyūs ho ga.e haiñ kuchh ab āshiyāñ se ham

dekhiye girtī hai ye bijlī kahāñ
vo pashīmāñ hai na jaane kis liye

ik jhalak tum jo lab-e-bām dikhā jaate ho
dil pe ik kauñdtī bijlī sī girā jaate ho

taḌap ke ḳhirman-e-gul par kabhī gir ai bijlī
jalānā kiyā hai mire āshiyāñ ke ḳhāroñ kā

ḳhabar kī thī gulistān-e-mohabbat meñ bhī ḳhatre haiñ
jahāñ girtī hai bijlī ham usī Daalī pe jā baiThe

hai abr to kyā chāhe falak ko bhī jalā de
bijlī meñ kahāñ shola-fishānī mire dil kī

jalātī ek bijlī kyūñ-kar itne āshiyānoñ ko
chaman ke patte patte par hamārā āshiyāñ miltā