Tags-Bijli

apne pairoñ meñ bhī bijlī kī adā.eñ thiiñ magar
dekh kar tūr-e-jahāñ ḳhud ko subuk-gām kiyā

hove atrāf se ghanghor ghaTā ghir aa.ī
kauñd bijlī kī ho aur paḌtī phuvār aa.e nazar

kyā isī kā naam hai soz-e-mohabbat ham-nashīñ
ek bijlī sī mirī rag rag meñ lahrātī to hai

bijlī ke taar pe baiThā huā hañstā panchhī
sochtā hai ki vo jañgal to parāyā hogā

jo chiñgārī thī pahle ab vo bijlī ban ga.ī baḌh kar
mohabbat umr Dhal jaane se kyā kam hotī jaatī hai

bijlī kā tiir jaise dhanak kī kamān meñ
kyā aur is shabāb kī koī misāl de

lahr dariyā ke saath rahtī hai
bijlī bādal meñ hai ajab rishta

vādi-e-dil meñ ka.ī rātoñ se sannāTā hai
kaash bijlī hī tire abr-e-sitam se gir jaa.e

hayā se sar jhukā lenā adā se muskurā denā
hasīnoñ ko bhī kitnā sahl hai bijlī girā denā

shafaq dhanak mahtāb ghaTā.eñ taare naġhme bijlī phuul
is dāman meñ kyā kyā kuchh hai dāman haath meñ aa.e to

buland āshiyānoñ pe bijlī girī
jo nīche the Duube vo sailāb meñ

chamaktī hai koī bijlī to sham-e-rahguzar ban kar
nigāh-e-barham in kī kuchh to sharmā.ī bhī hotī hai

fareb-e-raushnī meñ aane vaalo maiñ na kahtā thā
ki bijlī āshiyāne kī nigahbāñ ho nahīñ saktī

bhūkoñ kī nigāh meñ hai bijlī
ye barq abhī girī nahīñ hai

bujhānā bhuul jaa.eñ kaise jaltī battiyāñ ghar kī
hamāre ghar ai hākim bijlī sarkārī nahīñ aatī

jo hai 'fayyāz' us ko dekh kar mab.hūt hairat kyā
taḌaptī hai jo bijlī aañkh ḳhīra ho hī jaatī hai

saroñ pe bijlī girī taar thartharāne lage
magar ye giit na.ī nasl ko suhāne lage

bijlī ban kar aafat Dhā.eñ
duur huuñ phir to saarī balā.eñ

allāh ḳhabar bijlī ko na ho gulchīñ kī nigāh-e-bad na paḌe
jis shāḳh pe tinke rakkhe haiñ vo phūltī-phaltī jaatī hai

kuchh iztirāb-e-ishq kā aalam na pūchhiye
bijlī taḌap rahī thī ki jaan is badan meñ thī