Tags-But

ta.ana-zan kufr pe hotā hai abas ai zāhid
but-parastī hai tire zohd-e-riyā se behtar

ham ishq ke bande haiñ maz.hab se nahīñ vāqif
gar ka.aba huā to kyā but-ḳhāna huā to kyā

hazrat-e-ishq ne donoñ ko kiyā ḳhāna-ḳharāb
barhaman but-kada aur shaiḳh haram bhuul ga.e

yād-e-butāñ se ka.aba-e-dil but-kada huā
tār-e-nafas bhī rishta-e-zunnār ho gayā

kab kālbud-e-ḳhāk meñ ho itnī nazākat
jo but hai vo putlā hai magar nāz-o-adā kā

mohtāj nahīñ qāfila āvāz-e-darā kā
sīdhī hai rah-e-but-kada ehsān ḳhudā kā

āgahī ne jab dikhā.ī rāh-e-irfān-e-habīb
but the jitne dil meñ sab qibla-numā hone lage

haq baat to ye hai ki usī but ke vāste
zāhid koī huā to koī barhaman huā

dushman se aur hotīñ bahut bāteñ pyaar kī
shukr-e-ḳhudā ye hai ki vo but kam-suḳhan huā

chaman meñ ik but-e-nāzuk-adā mahv-e-tamāshā hai
nayā gul aaj ham ne dāman-e-gulzār meñ dekhā

ka.abe meñ saḳht-kalāmī sun lī
but-kade meñ na kabhī ā.iyegā

hai dam-e-murdan tasavvur ai but-e-zebā tirā
maut aa.egī to ban kar terī sūrat aa.egī

sar-e-shorīda ko maiñ pattharoñ se phoḌtā phirtā
but-e-kāfir jo tū merā ḳhudā hotā to kyā hotā

tab ālam-e-mastī kā mazā hai ki paḌī ho
gardan pe mirī us but-e-maḳhmūr kī gardan

but ḳhudā huuñ ki na huuñ hai magar itnī tauqīr
but-kada aaj bhī ka.aba hai musalmānoñ kā

dil-e-nādāñ kī hai kyā asl agar buqrāt bhī hotā
to aatā vo bhī dam meñ us but-e-ayyār-o-pur-fan ke

marā huuñ ik but-e-ġhārat-gar-e-dīñ kī mohabbat meñ
kafan merā sile tāroñ se zunnār-e-barhaman ke

qadam kyūñ-kar na luuñ but-ḳhāne meñ ik ik barhaman ke
ki aayā huuñ yahāñ maiñ shauq meñ ik but ke darshan ke

mujhe to hai ġharaz insāniyat se
haram vaalā ho yā but-ḳhāne vaalā

but-parastī se na tīnat mirī zinhār phirī
sub.h sau baar ḳharīdī ga.ī sau baar phirī