Tags-But

husn-e-mutlaq kā nishāñ ka.abe meñ to miltā nahīñ
ehtiyāt aao chal kar dekh leñ but-ḳhāna ham

sar uThā.ūñ kyūñke maiñ 'mus.hafī' nahīñ mujh meñ tāb-o-tavāñ zarī
ki ḳhirām us but-e-shoḳh kī mujhe ḳhaak hī meñ milā ga.ī

mohabbat kā e.ajāz hai aur kyā
ki jis but ko chāhā ḳhudā ho gayā

vo but-kada thā jahāñ sar jhuke charāġh jale
ye mai-kada hai yahāñ ḳham uThe sharāb chale

but-parastī ko to islām nahīñ kahte haiñ
mo'taqid kaun hai 'mīr' aisī musalmānī kā

faqīh-o-shaiḳh ke zehnoñ meñ but hoñge ḳhudāoñ ke
maiñ insāñ huuñ mujhe to sirf insāñ yaad aate haiñ

uTh ke but-ḳhāne se masjid ko agar jā.egā tū
saikḌoñ TūTeñgī tasbīheñ tire zunnār par

but-kade meñ bhī gayā ka.abe kī jānib bhī gayā
ab kahāñ DhūñDhne tujh ko tirā shaidā jaatā

but-ḳhāne se dil apne uThā.e na ga.e
ka.abe kī taraf mizāj laa.e na ga.e

us nagrī meñ qadam qadam pe sar ko jhukānā paḌtā hai
us nagrī meñ qadam qadam par but-ḳhāne yaad aate haiñ

ka.abe meñ but-kade meñ ḳharābāt meñ rahe
insāñ vo hai kahīñ jo kisī par garāñ na ho

is but se dil lagā ke bahut sochte rahe
sabr-o-sukūñ luTā ke bahut sochte rahe

maiñ qurbāñ ḳhudā.ī ke vo but jo pūchhe
haiñ armān dil meñ nihāñ kaise kaise

kyā jāniye kis rañg meñ hai shams 'zubairī'
but ek taraf zikr-e-ḳhudā bhī nahīñ karte

tumhāre daur meñ har aadmī hai but kī tarah
hamāre ahd meñ patthar bhī be-zabān na thā

saath fahmīdgī gar hove to phir
but-parastī bhī mazā rakhtī hai

rahīn-e-rasm-o-rivāyat ho jis kī but-shikanī
vo but-shikan bhī haqīqat meñ somnātī hai

barakat kis ke qadam kī hai 'rashīd'
ki azaañ hotī hai but-ḳhāne meñ

jaan us but meñ lagī rahtī hai
apne ko paate haiñ begāne meñ

har talabgār ko mehnat kā sila miltā hai
but haiñ kyā chiiz ki DhūñDhe se ḳhudā miltā hai