Tags-But

jitne but haiñ maiñ sab pe martā huuñ
merā īmān ek ho to kahūñ

kuchh aisī tauba-shikan har ik baat us but-e-lā-javāb kī hai
hai gesuoñ meñ ghaTā kā aalam nazar meñ mastī sharāb kī hai

chup the jo but savāl ba-lab bolne lage
Thahro ki qaus-e-barq-o-lahab bolne lage

giraft meñ huuñ kisī but kī 'āftāb-husain'
ḳhudā ko bāñdhtā rahtā huuñ apne sheroñ meñ

āshiqoñ ko naf.a kab hai inqilāb-e-dahr se
ham vahī bande raheñge but ḳhudā ho jā.eñge

ālam-e-husn ḳhudā.ī hai butoñ kī ai 'zauq'
chal ke but-ḳhāne meñ baiTho ki ḳhudā yaad rahe

kam-ayārī ne ḳhudā-soz banāyā aisā
but to sab yaad rahe ek ḳhudā bhuul ga.e

nikle jo rāh-e-dair se ik hī nigāh-e-mast meñ
gabr kā sabr kho diyā but ko bhī but banā diyā

ḳhushī kyā ho jo merī baat vo but maan jaatā hai
mazā to behad aatā hai magar īmān jaatā hai

mujhe but banā ke chale ga.e ki na ro sakūñ
unheñ merā itnā ḳhayāl thā ye pata na thā

'vahshat' us but ne taġhāful jab kiyā apnā shi.ār
kaam ḳhāmoshī se maiñ ne bhī liyā fariyād kā

ye duā ka.aba meñ karte haiñ ki us but se milā
tere darvāza par aa kar ai ḳhudā baiThe haiñ ham

ka.aba-o-but-ḳhāna vāloñ se judā baiThe haiñ ham
ik but-e-nā-āshnā se dil lagā baiThe haiñ ham

shān-e-ḳhudā ayaañ hai har but se mai-kade meñ
ka.abe meñ tum ne jā kar ai 'shād' kyā banāyā

ai but-e-kāfir ma.āz-allāh ye terā shabāb
koī kāfir hī rahegā ab musalmāñ dekh kar

hai mujhe pās-e-vafā ai but-e-ayyār faqat
varna kuchh tū hī nahīñ ek tarah-dār faqat

dil bahut rotā hai lekin us but-e-maġhrūr se
munqat'a har ek rishta ho gayā to ho gayā

'jalīl' āḳhir jo kī hai shā.erī kuchh kaam bhī nikle
kisī but ko musaḳhḳhar kījiye mojiz-bayāñ ho kar

ai 'qalaq' but-kade meñ bāñdh ehrām
ham se lillāh rifāqat mat toḌ