Tags-But

'nūh' ham ko nazar aayā na yahāñ but bhī koī
log kahte the ki ka.abe meñ ḳhudā miltā hai

koī jañchtā nahīñ us but ke sivā
aur bhī yuuñ to sanam achchhe haiñ

kyā bolne meñ us but-e-kāfir kī adā hai
shīrīñ-suḳhanī ik taraf āvāz to dekho

tā.ūs-e-parī-jalva ko Thukrā ke chale hai
andāz-e-ḳhirām-e-but-e-tannāz to dekho

but to duniyā ne ba-har-gām tarāshe lekin
sar jhukāne ke na aa.e kabhī ādāb mujhe

tū bhī us but kī ziyārat kā sharaf hāsil kar
us ke qadmoñ pe ka.ī baar jhukā huuñ maiñ bhī

jaise sadiyoñ ke chaTānoñ pe tarāshe hue but
ek dīvāne musavvir kī tabī.at kā ubaal

ḳhabar kyā thī ki terī kaj-adā.ī se but-e-rā.anā
bisān-e-sham.a ro kar aarzū mahfil se niklegī

but kareñ aarzū ḳhudā.ī kī
shaan terī hai kibriyā.ī kī

haañ vahī phir ka.aba ban jā.egā ai sheḳh-e-haram
but-kade kā pahle naqsha khīñch phir naqsha bigāḌ

nichhāvar but-kade par dil karūñ ka.aba to kosoñ hai
kahāñ le jā.ūñ itnī duur qurbānī mohabbat kī

phir 'shauq' se kyā us but-e-ayyār se bigḌī
hote nahīñ bāham jo ishāre ka.ī din se

us but-e-kāfir kā zāhid ne bhī naam aisā japā
dāna-e-tasbīh har ik rām-dānā ho gayā

hai firāq-e-but-e-ḳhud-kām meñ 'nāsiḳh' kā kalām
huuñ maiñ nākām mujhe kaam se kuchh kaam nahīñ

but toḌne se but-kada ka.aba nahīñ hotā
pahle kabhī hotā ho ab aisā nahīñ hotā

shabāb aayā kisī but par fidā hone kā vaqt aayā
mirī duniyā meñ bande ke ḳhudā hone kā vaqt aayā

nazar paḌā ik but-e-parī-vash nirālī saj-dhaj na.ī adā kā
jo umr dekho to das baras kī pe qahr o aafat ġhazab ḳhudā kā

miT jā.eñge duniyā se bhī ham diid ke guzre
gar ai but-e-kāfir yahī be-dād rahegī

tum ne but banā.e haiñ tum ko hī mubārak hoñ
but-shikan qabīle se āzarī nahīñ hotī

muñh moḌ but-kada se haram ko chalā hai shaiḳh
'uzlat' magar hai ka.abe hī meñ yahāñ ḳhudā na thā