Tags-But

but-gar hai na koī but-shikan hai
sab vahm-o-gumān-e-brahman hai

but bhī rakkhe haiñ namāzeñ bhī adā hotī haiñ
dil merā dil nahīñ allāh kā ghar lagtā hai

husn hī husn hai kashmīr ke but-ḳhāne meñ
dūdhiyā chāñdnī phailī huī pūnam jaise

kibriyā.ī kī adā tujh meñ hai
garche tū but hai ḳhudā tujh meñ hai

chāhe chaurāhe kī shobhā hoñ ki mandir meñ makīñ
but kahīñ bhī sajeñ patthar ke sivā kuchh bhī nahīñ

kabhī ham but kabhī nūr-e-sanam ko dekh lete haiñ
aqīde se baḌī dair-o-haram ko dekh lete haiñ

vahī ma.abūd hai 'nāzim' jo hai mahbūb apnā
kaam kuchh ham ko na masjid se na but-ḳhāne se

ab kaun phire kū-e-but-e-dushman-e-dīñ se
allāh ke ghar kyuuñ na chale jaa.eñ yahīñ se

kaun sā ghar hai ki ai jaañ nahīñ kāshāna tirā aur jalva-ḳhāna tirā
mai-kada terā hai ka.aba tirā but-ḳhāna tirā sab hai jānāna tirā

but ko dekhā to but huā 'ḳhālid'
jī meñ thā dekh kar guzar jā.ūñ

dast-e-san.at se bane us ke agar tujh sā but
kyuuñ havā apnī ḳhudā.ī kī na aazar bāñdhe

vo hīla-gar jo vafā-jū bhī hai jafā-ḳhū bhī
kiyā bhī 'faiz' to kis but se dostāna kiyā

kabhī dair meñ haiñ kabhī ka.abe meñ kabhī dil meñ haiñ kabhī āñkhoñ meñ
ye but bhī ḳhudā.ī karte haiñ lo aur suno lo aur suno

ḳhudā ma.alūm kaisā sehr thā is but kī chitvan meñ
chale jaatī haiñ ab tak chashmakeñ shaiḳh-o-barahman meñ

but-e-be-dard kā ġham monis-e-hijrāñ niklā
dard jaanā thā jise ham ne vo darmāñ niklā

paḌh ke qāsid ḳhat mirā us bad-zabāñ ne kyā kahā
kyā kahā phir kah but-e-nā-mehrbāñ ne kyā kahā

sū-e-dozaḳh but-e-kāfir ko jo jaate dekhā
ham ne jannat se kahā haa.e udhar kyuuñ na ga.e

ab ḳhudā hī se lau lagā.ūñgā
de ke dil but ko maiñ zalīl huā

but to vallāh banā leñge kabhī
shor-e-nāqūs barahman hī sahī

is gumbad-e-be-sadā meñ ham log
alfāz ke but tarāshte haiñ