Tags-But

barahman le ke jo mere liye zunnār aayā
us ne samjhā ki yahī but kā ḳharīdār aayā

vahī haram hai vahī but vahī pujārī haiñ
vahī diloñ kā ta.alluq hai somnāt ke saath

har jagah maujūd samjhā us ko sajda kar liyā
ḳhvāh masjid ḳhvāh girjā ḳhvāh but-ḳhāna huā

TuuTe but masjid banī mismār but-ḳhāna huā
jab to ik sūrat bhī thī ab saaf vīrāna huā

āḳhir koī sūrat bhī to ho ḳhāna-e-dil kī
ka.aba nahīñ bantā hai to but-ḳhāna banā de

idhar mai-kada hai udhar but-kada hai
idhar merā saaqī udhar dilrubā hai

kisī ko to musharraf kar de ai zauq-e-jabīñ-sā.ī
taqāzā kar rahe haiñ kaaba o but-ḳhāna barsoñ se

jis kā rāhib shaiḳh ho but-ḳhāna aisā chāhiye
mohtasib saaqī bane mai-ḳhāna aisā chāhiye

kabhī qasd-e-haram ko jab qadam apnā uThātā huuñ
mire har ik qadam par ik nayā but-ḳhāna aatā hai

yārab us but ko shoḳhiyāñ ātīñ
duur us se hijāb ho jaatā

kibr bhī hai shirk ai zāhid muvahhid ke huzūr
le ke tesha ḳhāksārī kā but-e-pindār toḌ

kabhī haram meñ kabhī but-kade ko jaatā huuñ
zamīn DhūñDh rahā huuñ mazār ke qābil

vasl-e-but-e-mahrū hai sharb-e-mai-e-gulgūñ hai
phir aur ināyāt-e-yazdāñ kise kahte haiñ

mahshar kā hameñ kyā ġham isyāñ kise kahte haiñ
palle pe vo but hogā mīzāñ kise kahte haiñ

but ko pūjūñgā sanam-ḳhānoñ meñ jā jā ke to maiñ
us ke pīchhe mirā īmān rahe yā na rahe

but-ḳhāne banā karte haiñ kis tarah masājid
jab naġhma-e-nāqūs azaañ ho nahīñ saktā

hotī na sharī.at meñ parastish kabhī mamnua
gar pahle bhī but-ḳhānoñ meñ hote sanam aise

tasbīh namāz roza se mujh ko nahīñ hai kaam
maiñ but-parast huuñ mirā pahchān ye suḳhan

mirī be-kasī pe tirī nazar na paḌī jab ai but-e-ishva-gar
vo jo terā ahd-e-shabāb thā so vo ain josh-e-bahār thā

jo but-kade meñ the vo sāhibān-e-kashf-o-kamāl
haram meñ aa.e to kashf-o-kamāl se bhī ga.e