Tags-But

dil-e-sīpāra ko le Taañk tāvīzoñ meñ haikal ke
na sarkā ye hamā.il ai but-e-be-pīr pahlū se

but-kada kuchh dar-e-qubūl nahīñ
yās-e-nākāmī-e-duā kab tak

jo ki sajda na kare but ko mire mashrab meñ
āqibat us kī kisī taur se mahmūd nahīñ

saḳht kāfir kā dil afsos na sharmāyā kabhī
puujā juuñ but to bahut sañg-dil apnā ham ne

yuuñ but banā vo khaḌā thā ki kyā batā.ūñ tumheñ
maiñ us ko chhūne se pahle ḳhayāl samjhā thā

chashm-e-vahdat se gar koī dekhe
but-parastī bhī haq-parastī hai

bevafā.ī kī alāmat ban chuke asnām sab
dil ke but-ḳhāne meñ 'raunaq' ab koī patthar na rakh

aalam mushtāq diid kā hai
vo but na dikhā.e muñh ḳhudā hai

baat thī jab ki but-kade meñ 'obaid'
baiTh kar tum ḳhudā ḳhudā karte

chashm-e-mūsā hama-tan ban gayā maiñ hairat se
dekhā ik but kā vo aalam ki ḳhudā yaad aayā

'nasīr' dekh to kyā jalva-e-ḳhudā.ī hai
hamāre us but-e-ḳhāna-ḳharāb ke ghar meñ

jalva-e-husn-e-parastish garmi-e-husn-e-niyāz
varna kuchh kaabe meñ rakkhā hai na but-ḳhāne meñ hai

jis pe but-ḳhāna tasadduq jis pe kaaba bhī nisār
ek sūrat aisī bhī sunte haiñ but-ḳhāne meñ hai

diye terī rahguzāroñ ke jahāñ jahāñ jale haiñ
na charāġh-e-but-kada hai na charāġh-e-ḳhānqāhī

apne hī ghar ke sāmne huuñ but banā huā
parde haTe hue haiñ darīcha khulā huā

ba-juz abr de but-e-bāda-kash nahīñ dil ke vāste jā.e-ḳhush
ki ye shīsha aur vo taaq hai tū 'nasīr' jā ke use dhar aa

ishq huuñ to sham-e-husn-e-yār kā parvāna huuñ
husn huuñ to maiñ charāġh-e-ka.aba-o-but-ḳhāna huuñ

but-shikan mutma.in na hoñ ki abhī
nā-tarāshīda haiñ hazāroñ sanam

dil na us but kā dukhe kahtā hai ishq
khīñch jo naala vo be-tāsīr khīñch

ik Dhab pe kabhū vo but-e-ḳhud-kām na paayā
dekhā meñ jo kuchh sub.h use shaam na paayā