Tags-But

mujh ko ka.aba meñ bhī hamesha shaiḳh
yād-e-ayyām-e-but-parastī thī

vo but jo ḳhudā aaj bane baiThe haiñ un ko
ye shān-e-ḳhudā.ī ba-ḳhudā ham se milī hai

marte haiñ kabhī aa ke hamārī bhī ḳhabar le
aah ai but-e-bedard ye bīmār haiñ tere

ham-chashmoñ par lagā.ī haiñ us but ne goliyāñ
toḌe hue haiñ sher ġhazāloñ ke sāmne

dekhā hai āshiqoñ ne barahman kī aañkh se
har but ḳhudā hai chāhne vāloñ ke sāmne

diyā navishta na us but ko dil ke tuude meñ
ḳhudā ke ghar kā bhalā maiñ qabāla kyā kartā

merā darmāñ hai na ka.abe meñ na but-ḳhāne meñ
riñd huuñ mujh ko paḌā rahne do mai-ḳhāne meñ

ka.abe kī taraf jaane ko ham jā.eñge zāhid
dil mahv-e-ḳhyāl-e-rah-e-but-ḳhāna rahegā

ġhaflat-e-qalb se zuhhād paḌheñ ba.ad-e-namāz
barahman sajda kare but ko ḳhudā se pahle

ai sanam allāh re jalva tirā hairat-fazā
but bane haiñ sāhib-e-zunnār qaisar-bāġh meñ

hai but-e-ḳhuñ-ḳhār bahut tund-ḳhū
bosa ke saa.il na huā chāhiye

sub.h-e-ka.aba shām-e-but-ḳhāna kī hai mujh ko talāsh
DhūñDhtī hai sub.h-e-ka.aba shām-e-but-ḳhāna mujhe

paa.eñ kyā dīvāna-e-miz.hgāñ but-e-tarsā meñ lutf
sozan-e-īsā meñ nok-e-ḳhak-e-shahrā.ī nahīñ

chashm-e-vahdat se gar koī dekhe
but-parastī bhī haq-parastī hai

pheñk āñkhoñ ko kisī jhiil kī gahrā.ī meñ
but koī soch ki āvāra ḳhayālī jaa.e

phir raah dikhā mujh ko ai mashrab-e-rindāna
kuchh bahs nahīñ is se ka.aba hai ki but-ḳhāna

badal ke duniyā ne bhes sad.hā ise Darāyā use lubhāyā
kabhī zan-e-pīr-zāl ban kar kabhī but-e-shoḳh-o-shañg ho kar

apnī mahfil meñ mujhe dekh ke kahtā hai vo but
kyuuñ mire ghar meñ musalmān chale aate haiñ

sach agar pūchho to ham kāfir bhī haiñ momin bhī haiñ
but-kada meñ baiTh kar yād-e-ḳhudā karte rahe

ai but-e-nā-āshnā kab tujh se begāne haiñ ham
tū agar is bazm meñ mai hai to paimāne haiñ ham